Empezaremos aprendendo a controlar os movementos dun servo motor para poder desenvolver o noso primeiro prototipo de robot musical secuenciado con Pure Data.

Escollemos os Servos para comezar porque son os dispositivos mecánicos máis sinxelos de conectar a Arduino sen necesidade de ningún outro dispositivo, compoñente ou alimentación externa.

Tamén aprenderás xa a traballar con secuencias e patróns que controlen ritmicamente os movementos deste dispositivo para poder aplicalo sobre un elemento vibratorio e producir son de xeito controlado.

¿QUE SON OS SERVOS?

Os Servos son un tipo de motores que permiten controlar os xiros e a velocidade do seu eixo con precisión e poden permanecer fixos nun punto concreto da traxectoria que percorren. Para elo levan incorporado unha serie de rodas dentadas que reducen a súa velocidade.

Existen moitos modelos diferentes, e, dependendo do proxecto ao que nos enfrontemos e a forza que precises, escolleremos uns ou outros. Para a seguinte actividade imos traballar co máis básico, un Servo pequeno que se pode atopar nas tendas de electrónica ou de robótica.

Tamén tes que saber que hai dous tipos dependendo do xiro que queiramos, os que xiran 360º ou os que xiran 180º. Nos utilizaremos estes últimos porque son os máis doados de atopar, e para os nosos instrumentos experimentais deberían de ser suficiente. De tódolos xeitos se buscas na rede poderás ver xeitos de converter un Servo de 180º en 360º de forma relativamente sinxela.

Nesta práctica usamos concretamente este modelo.

servo motor