2.2.2 Aumento da produción agrícola

A mediados do século XVIII Inglaterra xa contaba coa agricultura máis produtiva de Europa. Danse unhas transformacións, as máis importantes desde a invención da agricultura no Neolítico, polo que se denominan Revolución Agrícola. Estes cambios van permitir un aumento de poboación sen precedentes, o que liberou unha porcentaxe de man de obra no campo que derivou cara ás cidades e á industria, e débense aos seguintes factores:

• Modificación do sistema de propiedade: fomentouse a privatización das parcelas agrícolas, o seu pechamento (enclosures), así como a concentración nas mans de grandes propietario. Nelas aplicábanse as últimas innovacións tecnolóxicas (rotación de cultivos, emprego de fertilizantes, etc.).
• Mecanización e introdución de melloras técnicas: aparición da sementadora e do arado de ferro (que posibilita un arado máis profundo). Úsase o cabalo en lugar dos bois.
• Sistema Norfolk ou de rotación cuadrienal.

O sistema Norfolk permitiu a desaparición do barbeito mediante a introdución de plantas forraxeiras. Isto levou ao estabulamento do gando (que podía alimentarse coas plantas forraxeiras) que, unido á mecanización dos apeiros de labranzas, permitiu un aumento dos rendementos da terra e da produción.

• Selección gandeira: gandaría científica de selección de cría, que pretende mellorar o tamaño e a saúde das razas tradicionais. A carne comezará a estar o alcance de toda a sociedade, co que mellora a súa dieta.
• Novas plantas forraxeiras e outros cultivos traídas de América (millo, pataca, etc.).

Os avances da agricultura favoreceron a Revolución Industrial ao permitir alimentar unha poboación en crecemento. A diminución dos traballadores agrícolas polas melloras técnicas favoreceu a man de obra para a nacente industria. Por outra banda, a necesidade de maquinaria para a agricultura permitiu o pulo da industria metalúrxica e siderúrxica. Finalmente, moitos dos beneficios obtidos polos grandes propietarios agrícolas reinvestíronse na industria e no comercio, contribuíndo ao crecemento destes sectores.