Ola pequenos cidadáns e pequenas cidadás! Algunha vez vos preguntastes como funciona un concello? Pois ben, imos descubrilo xuntos. 

Un concello podería describirse como o cerebro do noso municipio. Encárgase de que todo funcione á perfección. Por exemplo, de manter as rúas e estradas limpas, que existan zonas verdes, que o alumeado funcione correctamente polas noites etc.

No concello traballan persoas que se encargan de coidar o noso municipio.  Estas persoas son elixidas pola veciñanza nas eleccións municipais, que normalmente se celebran cada catro anos. Existen dous cargos principais dentro do equipo de goberno dun concello: 

O alcalde ou alcaldesa, que encabeza o equipo de goberno e é a cabeza máis visible. Encárgase de tomar decisións importantes para o ben do concello. 

Os concelleiros e concelleiras encárganse de temas específicos e son os máximos responsables dos diferentes departamentos nos que se divide o concello, as concellarías. Existen concellarías de educación, deportes, cultura, limpeza, seguridade... As concellarías dependen das demandas e necesidades do concello, polo que poden mudar dunha lexislatura para outra ou dun territorio para outro.

O alcalde ou alcaldesa e os concelleiros e concelleiras reúnense no concello para falar dos problemas do municipio e buscar solucións. Traballan en equipo para que os habitantes do concello estean conformes e teñan unha boa calidade de vida.