Parece que viaxaras cara o solpor na procura do sol xa que a luz do día vólvese cada vez máis intensa. Nesta ocasión o bambeo da viaxe co compás máxico foi moito máis suave. Incluso podes entreabrir algo os ollos e observas que o compás máxico te indica dirección oeste.

Por fin os teus pes pisan terra.

Percibes unha agradable e familiar brisa cálida sobre a túa pel.

Unha persoa achégase cara ti camiñando tranquilamente por un sendeiro. Agardas con paciencia a que se aproxime máis e podes ver que leva roupa de traballo de campo. Uns guantes grosos e unhas tesoiras de podar nunha man e a cabeza cuberta cun chapeu de palla.

- Ciao! eu son Andrea e guiareite esta vez, así que... parabéns por chegar ao Piamonte! - comeza amablemente.

- Ciao? pero se acabo de chegar! - replicas con estrañeza.

- Non me estaba despedindo! - aclara enseguida - Estás en Italia e aquí saudamos e despedímonos coa mesma palabra: Ciao.

Respiras con alivio. Sería unha mágoa ter que marchar sen coñecer máis a fondo esta rexión tan bonita!

No Piamonte hai moitos biótopos diferentes, como montañas, chairas, vales e lagos. Estes últimos drenan as súas augas ao río Po, que nace na cordilleira dos Alpes e é o máis importante de Italia.

O clima tamén é moi diverso. Na súa meirande parte ten clima continental como na meirande parte de Europa con moita diferenza de temperatura entre inverno e verán. Pero a proximidade do mar Mediterráneo suaviza as temperaturas na costa volvendo máis cálidos os invernos e refrescando os veráns o que se denomina clima mediterráneo. 

Porén, tamén nas cordilleiras o clima é de alta montaña!

Con esta diversidade no biótopo tamén a biocenose é moi variada!

Na montaña podes atopar cervos alpinos aproveitando os pastos do pé, cabras montesas nas zonas máis altas ou crebaosos que dominan todo o territorio coa súa capacidade de voar ata nas zonas máis altas desde onde deixar caer ás súas presas para romperlles os ósos e alimentarse dos seus miolos.

Pero non só nas montañas abunda a vida... No  val do río Po tamén temos moita fauna na que destacan os pequenos roedores e animais polinizadores que axudan a que os nosos cultivos prosperen.

Un destes polinizadores e a bolboreta Apolo. As súas cores, e o seu tamaño fan que sexan unha bolboreta moi rechamante.

A magoa é que ultimamente se atopa en perigo de extinción así que terías moita sorte de atopar algunha pousada polos nosos prados!

— Nestas zonas, tamén adaptamos o transporte ao terreo polo que debemos desprazarnos.

Ademais de todos os transportes que podes coñecer, seguramente chamarante a atención algúns outros que son típicos das zonas de montaña como o funicular, a telecadeira e os teleféricos.

Ao principio pode ser que te parezan moi semellantes, pero se te fixas ben, verás que aínda que todos serven para desprazarse por lugares de montaña, o funicular serve para desprazarse por terreos con gran pendente e a telecadeira e o teleférico axudan a salvar grandes desniveis.

O lugar no que máis frecuentemente atoparás as telecadeiras é nas estacións de esquí, nas que tamén hai remontes aos que os esquiadores se deben agarrar para subir as pistas.

— A que vos dedicades? — preguntas con curiosidade.

— Nesta zona do val do Po decidámonos ao cultivo da uva e á elaboración de produtos derivados coma o viño, o mosto, marmeladas... Agora mesmo cóllesnos no medio da poda. Quitámoslles ás vides todo o que lle dea sombra aos acios na primavera. As uvas precisan de sol e calor para madurar mellor.

Aínda que cada vez máis viticultores practican un cultivo sostible e ecolóxico, outros aínda utilizan praguicidas para evitar perder os cultivos por culpa de pragas como o fungo mildiu. Pero o uso destes produtos afectan á cadea alimentaria e moitas especies víronse afectadas.

De feito, a poboación dalgúns animais da nosa rexión coma o crebaosos ou a bolboreta Apolo están tendo un crecemento negativo debido ao cambio climático e a diminución da biodiversidade.