Actividade grupal 1 - Creando carteis

Como organizadores dun concurso de talentos seguro que queredes que o alumnado se anime a participar como público, polo que o reto deste grupo é crear un cartel para promover o voso evento.

Como podedes conseguir iso? Coa creación de carteleira orixinal coa que captar a atención do alumnado e conseguir así que acuda como público.

Tede en conta que é moi importante que o cartel debe cumprir uns requisitos:

- Ser orixinal e rechamante para captar a atención do posible público.

- Ofrecer a información sobre o evento, sen abusar de moito texto.

Aquí tendes un exemplo:

Podedes observar que é un cartel que busca captar a atención de toda persoa que o vexa da seguinte maneira:

- Ten unha imaxe orixinal e rechamante sobre o concurso.

- O nome do evento aparece nun tamaño axeitado, sendo fácil de visualizar.

- As datas da celebración do evento son claras.

- Non hai moito texto.

- Aparecen os organizadores ou co-organizadores. É importante que os posibles participantes saiban quen o organiza.

Se vedes un cartel deste concurso, gustaríavos acudir como público? Por que?

Actividade grupal 2 - Creando os decorados

Pensade no artista que levades dentro!

A vosa coreografía necesita si ou si outros elementos de atrezzo. Esta palabra non é máis que o conxunto de elementos que se necesitan para unha representación escénica. 

 Necesitades un xergón, unha cadeira? Quedaría ben facer un decorado en cartón? Un ambiente como de circo? Unhas letras xigantes co nome da canción? 

Cada coreografía é un mundo, cada actuación é especial e non podemos adiviñar o que vos fará falta, pero estamos seguros de que vos quedará incrible!

Actividade grupal 3 - Creando a lista de reprodución das actuacións

Cada grupo ten que ter clara a música que vai levar coa actuación. Podedes usar unha soa canción ou mesturar varias. Iso correría da conta de cada grupo, tedes algunhas apps onde o podedes facer.

Esta música ten que estar preparada canto antes mellor, e sobre todo lista para o día da simulación.  Para ese día o máis doado e que lle pasedes ás técnicas de luz e son un arquivo coa vosa música. Así elas poden gardalas todas nun USB, ou facer unha lista de reprodución.

Se cada un ten que poñer a súa música antes de actuar é un caos, e queremos un evento de nivel, así que técnicas de son... a traballar!

Actividade grupal 4 - Creando a rúbrica de avaliación das actuacións

Para crear unha rúbrica tedes que seguir os seguintes pasos:

1. Identificar que aspectos ten que valorar o xurado (por exemplo, dificultade da actuación, traballo en equipo, decorado e vestiario, sincronización coa música, axuste a espazo e tempo...).

2. Definir distintos niveis: principiante, intermedio, avanzado, experto.

3. Definir que se espera de cada aspecto a valorar en cada nivel. 

Aquí tendes un exemplo de rúbrica que podedes adaptar ao voso gusto:

Actividade grupal 5 - Creando e repartindo as entradas

Estaría ben que as entradas fosen parecidas ao cartel que anuncia o evento. Se isto non é posible, podedes facelas máis sinxelas, usando calquera app que vos axude co deseño. Poñémosvos o exemplo de como, con 4 cambios, o cartel pode convertese en entrada.

O seguinte paso sería facer fotocopias (importante, asegurádevos de facer suficientes!).

A continuación, tedes que repartilas entre todos os invitados e recordarlles que a teñen que levar o día da actuación para poder entrar.