No acrosport hai unha serie de roles diferentes que inflúen para a realización das figuras ou pirámides. Son os seguintes:

Portor/a: son as persoas que serven de base para as figuras e deben ser fortes e moi estables.

Áxil: persoa que realiza movementos dinámicos e flexibles, rubindo sobre o portor ou a portora e mantendo unha posición estable.

Ademais, hai roles adicionais coma poden ser:

Axudante: moi importante en figuras ou pirámides máis complexas ou movementos que poidan ter riscos. Encárgase de axudar ao portor/a ou ao áxil se teñen problemas para manter a figura. Pode servir de apoio ou recoller ao áxil se desequilibra ou cae. 

Observador/a: atende e dá consellos para aliñar e guiar aos participantes e así mellorar as figuras. 

Fotógrafo/a: ás veces, tamén existe unha persoa encargada de tomar fotos ou vídeos para analizar posteriormente e mellorar o traballo realizado. Nalgunhas ocasións, este traballo tamén o fai o observador.

Cando se realizan as figuras e as pirámides, existen diferentes tipos de agarres para asegurar as diferentes posturas. Son os seguintes:

• Presa man a man: similar a un saúdo dándose a man. Este tipo de agarre pode ser simple, cruzado dobre ou cruzado dobre mixto. Principalmente utilízanse para impulsar ao compañeiro ou compañeira durante a formación dunha 'pirámide ou estrutura' e ocasionalmente, para mantelo/a en posición durante a formación. 
• Presa de pinza: este tipo de agarre emprégase principalmente para manter as figuras ou posicións adoptadas.
• Presa man-pulso: a súa principal función tamén é soster as figuras ou posicións establecidas, aínda que ocasionalmente tamén se utiliza para impulsar ao áxil.
• Presa brazo-brazo: este agarre utilízase principalmente para manter unha posición na que un está boca abaixo. O que fai de base sostén ao compañeiro ou compañeira que está encima, agarrándoo polos ombreiros e os brazos, mentres que o que está arriba suxeita os brazos da persoa que fai de base.
• Plataforma: este tipo de agarre emprégase para escalar e soster ao compañeiro ou compañeira áxil mentres se constrúen diversas pirámides, ademais de lanzar aos áxiles durante varias acrobacias.