Na actividade anterior fuches quen de recoñecer a mensaxe que transmitían diferentes deportistas analizando a súa expresión facial e os seus xestos. Agora é a túa quenda.

Exporanse diferentes situacións que poden suceder durante a práctica deportiva e ti terás que expresar co teu corpo como te sentirías se estiveses vivindo esa situación na realidade. Haberá emocións positivas e estados de ánimo negativos. Isto permitirache entender que, no deporte, existe tanto a vitoria como a derrota, os momentos de máxima alegría en contraposición coas vivencias máis negativas, segundos que poden parecer eternos ou segundos que nos levarán á gloria...

Estás preparado/a? Soamente vas precisar seguir os seguintes pasos:

1) Escoita con máxima atención a situación deportiva narrada polo teu mestre ou mestra.

2) Imaxina que esa situación está sucedendo na realidade e ti ou o teu equipo sodes os/as verdadeiros/as protagonistas.

3) Transmite a través do teu rostro, xestos e movementos do teu corpo a emoción que sentirías nese momento. 

4) Fotografía ás persoas do teu grupo para acadar a mellor imaxe que represente esa emoción.