3.5 Cálculo directo de porcentaxes sinxelas

Algunhas porcentaxes son moi doadas de calcular, mesmo mentalmente. Fíxese nos exemplos seguintes:

• 50 %

Xusto a metade da cantidade. Por exemplo, o 50 % de 120 é 60, que é a metade de 120.

• 25 %

É a cuarta parte da cantidade, así que con dividir entre catro xa está calculado o 25 % (ou dividir dúas veces seguidas entre 2). Daquela, o 25 % de 600 é 150, xa que 600 entre 2 dá 300, e 300 entre 2 dá finalmente 150.

• 20 %

É a quinta parte da cantidade; dividimos por 5.

• 10 %

Hai que dividir a cantidade entre 10: o 10 % de 850 son 85.

• 5 %

É a metade do 10 % anterior. Exemplo: o 5 % de 400 son 40 : 2 = 20.

• 75 %

Son as 3/4 partes da cantidade; é dicir, dividimos por catro e multiplicamos por 3. Deste xeito, o 75 % de 600 calculámolo dividindo 600 entre 4, que dá 150, e 150 multiplicámolo por 3; resultado 450.