1.Introdución

1.1 Descrición da unidade didáctica

Esta unidade denomínase A lingua como instrumento de aprendizaxe. Por iso, analizaremos as principais técnicas de traballo intelectual (resumos, esquemas, subliñado...) e as estratexias de autoavaliación e de autocorrección máis eficaces. Ademais, como a lingua é unha ferramenta imprescindible do coñecemento en todos os ámbitos, reflexionaremos sobre textos habituais no ámbito académico (argumentativos e científicos), atendendo ao uso dos conectadores e aos esquemas sintáctico e semántico das oracións. Como exemplos de mensaxes cunha expresión especialmente coidada, que nos servirán de modelo, tamén leremos obras da literatura hispanoamericana do século XX e identificaremos as súas características principais. É recomendable que cada día traballe con ela entre unha e dúas horas.

• Ademais, debe ter en conta as seguintes puntualizacións:

• A unidade ten textos e exercicios en galego e castelán, en dúas partes ben diferenciadas. Ambas as linguas, xunto coa estranxeira, integran o ámbito da comunicación.

• Na unidade hai dous tipos de textos ou contidos: uns levan a etiqueta "aspectos teóricos", e son os que debe comprender e memorizar; outros carecen desa etiqueta, e son os que debe ler, comprender e comentar (aparecen precedidos do símbolo &).

• Os contidos e exercicios van clasificados en bloques ou partes, relacionados con distintos aspectos do estudo da lingua: comunicación oral, comunicación escrita, coñecemento da lingua, lingua e sociedade e educación literaria.

• Logo de rematada a unidade deberá ser quen de:

• Usar estratexias que faciliten a recollida de información: apuntamentos, subliñados, guións, fichas temáticas e resumos.

• Consolidar certas estratexias de lectura xa utilizadas, como a identificación do tema dun texto escrito co apoio contextual que este conteña.

• Elaborar esquemas en que se identifique a xerarquización adecuada das ideas.

• Nos textos argumentativos, analizar os argumentos para saber se se captou a mensaxe principal e a súa estrutura.

• Compor textos expositivos e argumentativos, elaborados a partir de diversas fontes.

• Comprender e analizar o uso das dúas linguas do ámbito nos documentos científicos e académicos.

• Recoñecer os esquemas semántico e sintáctico das oracións.

• Construír e transformar enunciados de acordo cun esquema sintáctico dado.

• Usar correctamente a terminoloxía sintáctica.

• Coñecer as características xerais, os autores máis importantes e algunhas obras da literatura hispanoamericana do século XX.

• Ler e comprender fragmentos de novelas ou contos hispanoamericanos do s. XX.

• Ler e comprender poemas valorando a función dos elementos simbólicos e dos recursos retóricos e métricos presentes neles.

• Usar estratexias para a comprensión das relacións entre cine e literatura.

• Crear textos de intención literaria partindo das características dos traballados ao longo das unidades.