2.3 O oso e o raposo

Era un oso e mais un raposo, que andaban buscando comida, e o raposo díxolle ao oso:

—Ai, Compadre, e que tal se imos á granxa do tío Pepe e roubamos un porco?

Pareceulle boa idea, e así fixeron. Foron silandeiros ata o curral; alí o oso, matou dun golpe o porco máis grande que atoparon, e marcharon correndo monte arriba.

Cando xa non tiñan folgos, sentaron baixo un carballo, e o raposo, pillastre, díxolle ao oso;

—Ai Compadre! non sei ti, pero eu non podo coa miña alma. Que tal se durmimos un anaco? Podemos enterrar o porco, co rabo fóra para sabermos onde está.

O oso, que foi quen levou o porco durante todo o camiño, aceptou sen dubidalo... pero ocorreu que entanto que o oso durmía, o raposo ergueuse, desenterrou o porco e papouno enteiriño, deixando soamente o rabo. Si que era lambón o raposo! E, ben caladiño, deixou o rabo do porco onde estivera co resto do corpo.

Cando o oso espertou e foron buscar o porco, atoparon o rabo, tal como o deixaran, e o raposo díxolle ao oso que tirara el do rabo, pois era máis forte.

Así fixo o oso. Colleu alento, e tirou do rabo con tal forza que, caeu de cu no chan, e fíxose moito dano, pero cando se ergueu todo encabuxado ao se decatar da brincadeira, o raposo comezou a botarlle a culpa ao oso, e así estiveron discutindo ata que dixo o raposo:

—Vamos deitarnos ao sol, e, ao que lle súe a barriga foi quen o comeu.

Deitáronse a durmir, e o oso durmiu, pero o raposo ergueuse e mexou por riba do compadre, e chamouno.

—Ai compadre! Ti fuches o que comiches o porco, porque che súa a barriga.

E así foi como o oso tivo que pedir desculpas e marchar para casa sen ter comido nadiña...

Conto popular . [http://www.geocities.com/Area51/Shadowlands/7336/os_rap_cer.htm]