Imaxes e formas

Que son as imaxes e formas e para que serven

As imaxes, elementos multimedia e formas permiten enriquecer de xeito visual ou, incluso, sonoro, un documento de Writer. Grazas a elas podes ilustrar o teu documento, crear esquemas ou calquera outra opción que che permita ter a información dun xeito máis gráfico.

Algunhas situacións nas que é útil empregalas:

• Inserir fotografías, imaxes ou outros elementos multimedia nun documento.
• Crear esquemas, diagramas de fluxo ou organigramas empregando formas.

Como inserir imaxes, formas e outros elementos multimedia

As imaxes e formas pódense inserir e editar dende o menú Inserir ou dende a barra de ferramentas.

Recomendacións

Á hora de empregar imaxes, elementos multimedia ou formas é importante:

• Non saturar o documento con demasiados elementos gráficos que poidan provocar a distracción da persoa lectora.
• Usar imaxes relacionadas co contido. 
• Empregar imaxes de calidade que permitan unha correcta visualización.
• Revisar a situación en relación ao texto para non desordenalo. 
• Manter un estilo similar nas gráficas e formas: mesmas cores, formas e tipografía.

    Axustar e ancorar, esa é a cuestión

Cando insires unha imaxe é moi importante ter claro como ancoralas e axustalas ao texto correctamente.

A ancoraxe determina como se move a imaxe cando escribimos ou modificamos o texto, mentres que o axuste é como se coloca o texto ao seu redor. Se non controlas estas opcións, as imaxes poden desprazarse soas e desordenar o documento.

Axuste do texto

O axuste define como se coloca o texto respecto da imaxe. Pódese cambiar facendo clic dereito sobre a imaxe → Axustar.

Preme e coñece cada opción: 

▸  Ningún

O texto non rodea a imaxe. A imaxe colócase nunha liña propia e o texto aparece só arriba e abaixo. É o máis sinxelo e o máis estable para traballos básicos.

▸  Paralelo

O texto rodea a imaxe por todos os lados, a imaxe queda incluída no parágrafo. Pode provocar desprazamentos raros se se move a imaxe.

▸  Ideal

O texto rodea a imaxe por todos os lados, pero é o programa que decide como. A imaxe tamén queda incluída no parágrafo, pero é menos controlable o seu comportamento se borramos texto.

▸  / Antes / Despois

O texto aparece só nun lado da imaxe. Á esquerda se elixes "antes" e á dereita se elixes "despois". É moi usado en revistas e xornais.

▸  A través

A imaxe pasa por riba do texto, só pode verse polos ocos internos. Neste caso o texto pode quedar pouco lexible.

▸  No fondo

O texto pasa por riba da imaxe, incluso polos ocos internos. Pode ser útil para facer efectos de marcas de auga ou fondos decorativos.

▸  Contorno

É similar ao ideal. O texto rodea a imaxe por todos os lados, o programa intenta que o texto chegue ata o bordo da contorna da imaxe.

Áncora do texto

O ancorado define a que está ligada a imaxe. Isto determina como se move cando escribimos ou borramos texto. Pódese cambiar facendo clic dereito sobre a imaxe → Áncora.

No menú contextual podes elixir as seguintes opcións:

1. Ancorada ao parágrafo: A imaxe móvese co parágrafo ao que pertence. Se o parágrafo baixa, a imaxe tamén. É a opción máis recomendable para documentos con moito texto.
2. Ancorada ao carácter: A imaxe está asociada a unha letra concreta. Se moves a letra, a imaxe móvese, se borras esa letra, a imaxe desaparece.
3. Ancorada como carácter: A imaxe compórtase como unha letra xigante, alíñase co texto e respecta entreliñado.

En LibreOffice Writer tamén existe a opción "Ancorada á páxina", pero non se atopa no menú contextual do botón dereito como as opcións anteriores. Podes acceder dende Formato → Imaxe → Propiedades. Neste caso, a imaxe queda fixa nun punto da páxina, non se move aínda que cambie o texto. Pode ser útil para logotipos ou marcas de auga.

Exemplos

En LibreOffice Writer pódense inserir diferentes elementos visuais e axustalos para mellorar a presentación dun documento. A continuación, podes observar exemplos de diferentes axustes e usos de imaxes e formas. 

O primeiro exemplo é unha imaxe cun axuste ideal. Este tipo de axuste fai é moi útil para incluír fotografías ou debuxos dentro dun texto sen dificultar a lectura.

O segundo exemplo é un organigrama, formado por formas e frechas. Neste caso utilízase o axuste “A través” para as frechas, este axuste é especialmente axeitado para esquemas e diagramas, xa que se integran mellor no texto.

O terceiro exemplo é un esquema de organización do equipo do club con formas da galería e modo de axuste "Ningún".