No medio da mañá chega ese momento tan desexado: soa o timbre e saes correndo ao recreo pero seguro que moitas veces pensaches: “Sempre o mesmo! A mesma xente, as mesmas conversas e os mesmos xogos… Como me gustaría formar un novo equipo e facer cousas diferentes!”. Todos e todas temos inquedanzas e habilidades moi diferentes, incluso algunhas que nin sequera coñecemos aínda, e quizais nunca te paraches a pensar no valor que tería compartir toda esta sabedoría e talento que tes co resto. Porque non todo o que aprendedes vén dos libros e das clases, tamén se pode aprender entre nós no tempo libre.

Os recreos poderían encherse de vida no teu centro grazas a ti e ao resto do alumnado de Educación Dixital. Soa ben, a que si? Pois é o momento de pensar como, de deixar atrás o aburrimento e darlle vida ao recreo, creando novos equipos, novas propostas e novas maneiras de aprender e de compartir para que fagan do recreo un espazo cheo de ilusión, creatividade e convivencia.