1. Fai un bocadillo daquilo que máis che guste. Quen di un...di dous.
2. Espreme laranxas para ter un vaso con zume de laranxa preto. Se é posible, emprega tamén un limón. (Todo o mundo sabe que os trasnos detestan o cheiro a limón.)
3. Leva unha camiseta posta, pero ten á man unha chaqueta por si vai frío no medio da historia.
4. Por se acaso, mete un dente de allo dentro do peto do pantalón ou da chaqueta. Tamén podes comer un, que disque son moi sans.
5. Se o necesitas, vai ao baño e fai o que teñas que facer.
6. Debuxa un círculo e ponte dentro del. Só poderás saír se pechas antes o libro. Por nada do mundo saias do círculo deixando o libro aberto.
7.  Se es dos que len no baño, non esquezas trazar o círculo debaixo dos pés. Non cho dixen, pero para facer o círculo podes empregar pintura, sal, outros libros (sempre pechados e, a poder ser, en galego) ou mesmo xoguetes. Isto vale tamén se es dos que len na cama.
8.  Asegúrate de ter a televisión, a radio, a tableta ou o computador apagados.
9.  Nunca, en ningunha circunstancia, metas un dedo no nariz. Algúns espíritos aproveitan este xesto para meterse dentro dos corpos.
10.  Se sentes a necesidade de rañar o cu, asegúrate de facelo sen que ninguén te mire. Non é  que vaia ocorrer nada malo, pero é unha falta de educación.
11.  Antes de comezar a historia deberás facer tres flexións, pegar tres chimpos e berrar: <<Gústame moito ler!>>.
12.  Se non liches o limiar, faino! Evitarache catastróficas consecuencias.
13.  Agarda a que o reloxo indique que case é medianoite.

Unha vez feito todo isto, estarás preparado ou preparada para comezar este libro sen temor a que ocorra nada fóra do normal.

Isto último, de calquera xeito, non cho podemos asegurar.

No recadro final tes que asinar para dar a túa conformidade con todas estas normas.

Fragmento de Alonso Diz, M. A. (2022). Instrucións para ler este libro. Vigo. Edicións Xerais, (Adaptado)