1. Contos con sentimento

Glosario

Emoción

Definición:: Sentimento temporal que se produce pola sorpresa, o medo ou a alegría, e que pode provocar cambios no corpo ou na mente.
Exemplo:: Viviu unha emoción tan forte que o fixo chorar.

Lenda

Definición:: Historia popular transmitida de xeración en xeración, que pode ter un fondo histórico pero que foi deformada e esaxerada co paso do tempo.
Exemplo:: Segundo a lenda, na cova vivía algún dos seres mitolóxicos dos que fala a avoa.

Obxectivos de desenvolvemento sostible (ODS)

Definición:: Os Obxectivos de Desenvolvemento Sostible (ODS) son unha lista de metas importantes que buscan mellorar o mundo no que vivimos. Foron aprobados no ano 2015 por todos os países que forman parte das Nacións Unidas e forman parte dun plan chamado Axenda 2030. Estes obxectivos intentan acabar coa pobreza, coidar o medio ambiente e conseguir que todas as persoas do mundo teñan unha vida mellor. Hai 17 obxectivos en total, e o plan é conseguilos en 15 anos traballando xuntos.
Exemplo:: O obxectivo número 4 dos ODS 2030 é fomentar o desenvolvemento da competencia lingüística e a expresión creativa a través da narración.

Contos con sentimento: a maxia das emocións nas nosas historias

As emocións forman parte da nosa vida cotiá e tamén están presentes nas historias que escoitamos e contamos. A través desta situación de aprendizaxe, mergullaraste no mundo das lendas e dos relatos, explorando como a lingua oral e escrita poden transmitir sentimentos e crear conexións entre as persoas.

Lectura facilitada

As emocións son importantes na vida e nas historias.

Nesta actividade imos explorar as lendas e os contos.

Veremos como as palabras falan dos sentimentos e nos unen.

Audio

Elaboración propia (proxecto cREAgal) con apoio de IA voz sintética xerada co modelo Celtia. Contos con sentimento (CC BY-NC-SA)

Que son os ODS?

Os ODS (Obxectivos de Desenvolvemento Sostible) son metas que a ONU fixo para que todo o mundo poida vivir mellor. Son 17 obxectivos que buscan coidar o planeta, acabar coa pobreza e facer que todas as persoas vivan en paz e igualdade.

Esta actividade contribúe ao ODS 4: Educación de calidade, ao fomentar o desenvolvemento da competencia lingüística e a expresión creativa a través da narración.

Tamén se vincula co ODS 11: Cidades e comunidades sostibles, xa que axuda a preservar a memoria cultural e o patrimonio oral das comunidades, recoñecendo a importancia das historias locais na identidade colectiva.

Lectura facilitada

Os ODS son 17 metas da ONU para un mundo mellor.

Esta actividade está relacionada

co ODS 4 (educación) e o ODS 11 (cidades),

porque traballamos a lingua e

as historias das nosas comunidades

Audio

Elaboración propia (proxecto cREAgal) con apoio de IA voz sintética xerada co modelo Celtia. Que son as ODS (CC BY-NC-SA)

Que vou aprender para levar a cabo esta tarefa?

Explorar e identificar as emocións presentes nas lendas e anécdotas da contorna.
Desenvolver habilidades narrativas a través da creación e transformación de historias.
Fomentar a expresión creativa mediante a ilustración e etiquetaxe de relatos con textos adaptados.
Consolidar coñecementos lingüísticos (clave) de maneira significativa e motivadora.
Promover o traballo en equipo e a colaboración na creación de " O gran libro das emocións".
Valorar e preservar o patrimonio cultural e a memoria oral da comunidade.
Contribuír ao ODS 4 (Educación de calidade) e ao ODS 11 (Cidades e comunidades sostibles)

Lectura facilitada

Pór en valor diferentes tipos de textos.
Describir escenarios e personaxes.
Organizar a información.
Secuenciar o contido.
Desenvolver habilidades colaborativas.
Mellorar a creatividade.
Realizar un proxecto e presentalo.

Audio

Elaboración propia (proxecto cREAgal) con apoio de IA voz sintética xerada co modelo Celtia. Obxectivos fase 1 (CC BY-NC-SA)

Licenciado baixo a Licenza Creative Commons Atribución Non-comercial Compartir igual 4.0