1.3 Presentamos o reto

Glosario

Ilustración

Definición:: Debuxo ou representación visual que se engade a un texto para axudar a comprendelo mellor ou facelo máis atractivo.
Exemplo:: Fixen unha ilustración cun sol sorrinte para acompañar a nosa historia sobre a alegría.

Narrativa

Definición:: Forma de contar unha historia, estruturada normalmente en introdución, nó e desenlace.
Exemplo:: A súa narrativa era tan envolvente que escoitabamos abraiadas.

Tradición oral

Definición:: Conxunto de coñecementos, contos, lendas e costumes transmitidos de xeración en xeración a través da palabra falada.
Exemplo:: A miña avoa contoume unha lenda sobre un moucho que voaba nos días de treboada. É parte da tradición oral da aldea.

O reto

Cando a creatividade se une ás emocións, nacen historias que nos fan rir, chorar, lembrar e soñar. Este reto é unha oportunidade para aprender a recoñecer o que sentimos, compartilo co mundo e gardalo nun libro moi especial que quedará na biblioteca do cole. Así contribuiremos á educación de calidade e fomentaremos a nosa contorna, como propoñen os ODS 4 e 11.

O noso reto será crear “O gran libro das emocións”, unha recompilación de historias que transmitan sentimentos e experiencias. Podes escoller entre dúas opcións:

Recoller unha historia ou lenda da contorna, contada por un familiar ou atopada por escrito, e analizala.
Inventar unha historia nova que represente unha emoción concreta.

Para acadar este reto, traballaremos paso a paso nos seguintes desafíos:

Primeiro reto:

Investiga, escoita ou imaxina

Busca e trae unha historia da túa contorna ou inventa unha nova co teu grupo.
A historia debe transmitir claramente unha emoción. Esa será a que representaredes no libro.

Segundo reto:

Escribe e dá forma

Escribe a historia coidando a estrutura narrativa (introdución, nó, desenlace). Vas poder inventala ou transcribir unha que coñezas.
Usa correctamente os determinantes, a concordancia e a ortografía traballada (como o uso de cc/ct e h).
Expresa ben a emoción escollida.

Terceiro reto:

Crear a páxina para o libro

Elabora unha páxina con título, historia e unha ilustración ou imaxe que acompañe.
Etiqueta a historia coa emoción que representa. Farémolo cun código de cores.
Organizaremos todas as historias por emocións no libro final.

Cuarto reto:

Facelo accesible para todas e todos

Adapta a historia para todas as persoas: podes engadir pictogramas, sinónimos ou explicacións.
De maneira opcional, podes gravar a historia en audio e xerar un código QR para que outras persoas poidan escoitala. Que che parece?
Así conseguiremos que o noso libro sexa para todas as persoas, sen importar como lles guste máis ler ou comprender.

Reto final

Compartimos emocións

Cada grupo presentará a súa historia á clase, contando como naceu e como a emoción se expresa no relato.
O gran libro das emocións quedará como un tesouro compartido na nosa biblioteca.

Preparados/as para comezar? Este será un traballo colaborativo onde a vosa creatividade e sensibilidade serán a clave. As vosas historias poden facer sentir, entender… e mesmo transformar.

Lectura facilitada

Imos facer un libro moi especial para a biblioteca do colexio.

Ese libro terá historias sobre como nos sentimos.

Chamámoslle “O gran libro das emocións”.

Este traballo axuda ao recoñecemento

e expresión das emocións.

Traballamos en equipo un reto que forma parte dos ODS 4 e 11.

Podemos facer este libro de dúas formas:

Buscar unha historia ou lenda real da nosa familia, do pobo ou da escola.
Inventar unha historia nova sobre unha emoción como a alegría, o medo ou a tristura.

Imos conseguir este reto facendo catro pasos, un por un:

Primeiro reto: buscade unha historia da vosa zona

ou inventade unha nova que teña unha emoción clara.

Segundo reto: escribide a historia (inventada ou real)

con introdución, nó e desenlace.

Usade ben as palabras e expresade a emoción.

Terceiro reto: Facede unha páxina para o libro con título, historia e debuxo.

Poñede a emoción da historia cunha cor.

Xuntaremos todas as historias por emocións nun libro.

Cuarto reto: adaptade a historia para que a entendan

todas as persoas, con debuxos ou explicacións.

Tamén podedes gravala en audio e facer un código QR para escoitala.

Reto final: cada grupo contará a súa historia á clase

e a emoción aparece nela.

O libro das emocións será para todos!

Estades preparados e preparadas?

Este traballo farémolo en equipo e cada un de vós é moi importante.

As vosas historias poden facer sorrir, pensar… e sentir.

Audio

Elaboración propia (proxecto cREAgal) con apoio de IA voz sintética xerada co modelo Celtia. O reto (CC BY-NC-SA)

Que conseguirás ao finalizar o reto?

Recoñecer e expresar emocións a través da creación de historias que conectan co que sentimos.
Coñecer e aplicar os elementos necesarios para escribir unha narrativa clara, ben estruturada e con sentido emocional.
Valorar a importancia da tradición oral, da escoita activa e da transmisión de historias dentro da nosa contorna familiar e cultural.
Mellorar a túa expresión escrita en galego, usando correctamente os determinantes, a concordancia e a ortografía traballada.
Desenvolver habilidades creativas para crear personaxes, escenarios e ilustracións que acompañen e dean forza ao relato.
Aprender a traballar en equipo, compartindo ideas, tomando decisións xuntos e respectando as achegas dos compañeiros/as.
Facer accesibles os vosos textos a todas as persoas, empregando recursos como pictogramas, audio ou sinónimos.
Compartir a vosa historia co grupo e formar parte dun libro colectivo que quedará na biblioteca do colexio.
Reflexionar sobre o proceso de aprendizaxe a través do diario de aprendizaxe e das presentacións finais.