Glosario

Bitácora

Definición:

Páxina web, xeralmente en forma de diario persoal, que se actualiza regularmente e presenta contidos de interese. Adoita recibir comentarios das persoas lectoras. Este termo é sinónimo de blog.

Exemplo:

Estou lendo un blog de deportes de aventura moi interesante.

Fondos da biblioteca

Imaxe dunha biblioteca con varios estantes de libros

Definición:

Catálogo de libros e outros materiais (documentos sonoros, documentos audiovisuais, obras de arte...) dunha biblioteca.

Exemplo:

Na biblioteca posúen un fondo de banda deseñada moi amplo.

Galipedia

Definición:

Enciclopedia en liña colaborativa escrita en lingua galega. As persoas que a dotan de contidos son persoas voluntarias.

Exemplo:

Busquei as dúbidas das tarefas na Galipedia.

Mensaxería instantánea

Imaxe dun móbil cunha mensaxe de WhatsApp

Definición:

Forma de comunicación en tempo real a través de mensaxes de texto, voz ou vídeo. Algúns exemplos desta mensaxería son WhatsApp, Telegram ou Discord. Esta comunicación pode darse entre dúas ou máis persoas.

Exemplo:

Voulle enviar un WhatsApp a miña nai para avisarlle de que chegarei un pouco máis tarde.

Xornais dixitais

Definición:

Xornais que podemos consultar por Internet e que se actualizan frecuentemente. Algúns deles teñen tamén a versión en papel e outras veces só existe a versión na Rede.

Exemplo:

Consultei a versión dixital de Nós Diario e así puiden enterarme da nova.

Un mundo para explorar

Imaxe dun ordenador que cunhas raias discontinuas sinala a esfera do mundo

Hoxe en día cun só clic temos a facilidade de acceder á información de maneira moi doada (xornais dixitais, fondos de bibliotecas, Galipedia...). No contexto académico, as aulas tamén precisan das Redes (libro dixital, aula Moodle, plataformas con xogos interactivos...).

A maneira de comunicarnos mudou moito nos últimos anos. Se antes a carta e logo o teléfono fixo eran os medios de comunicación máis habituais, agora a mensaxería instantánea é a raíña da comunicación. É bastante habitual, xa que logo, que nos fogares haxa algún ordenador ou tableta e varios móbiles.

Polo tanto, temos unha morea de posibilidades ao noso alcance, tanto para procurar información coma para comunicarnos. Agora ben, non resulta tan sinxelo navegar pola Rede. Require primeiramente coñecer que podemos atopar nela e cales son os riscos que podemos correr á hora de empregala e, por tanto, que recomendacións deberíamos seguir para evitar eses posibles perigos.

Como podemos, logo, enfrontarnos ao uso da Rede con confianza e seguridade? Que che parecería participar na creación dun blog de aula?

O reto será crear un blog de aula e recoller nel a información necesaria para empregar as novas tecnoloxías e ademais concienciar sobre o seu consumo responsable.

Nesta bitácora tamén vos achegaredes aos usos discriminatorios da linguaxe e aprenderedes a contrastar noticias con espírito crítico.

Lectura facilitada

Internet serve para buscar información de maneira fácil.

Tamén serve para comunicarte con outras persoas.

Debes coñecer os riscos de navegar por Internet.

Coñecerás unhas recomendacións para o seu uso.

Que che parece crear un blog? Este será o reto.

No blog recollerás información de como usar Internet e

tamén sobre os usos discriminatorios da linguaxe.

Ademais no blog traballarás coa noticia.

Audio

Que imos facer?

Neste proxecto ides crear un blog de aula que sirva de palestra onde publicar contidos sobre o uso da Rede que axuden á mocidade a orientarse no mundo dixital de maneira segura e responsable.

Para acadar este obxectivo, seguiredes diferentes niveis de complexidade (enfoque multinivel), con múltiples tarefas que realizaredes mediante un traballo grupal colaborativo.

Estas son as fases que ides seguir para conseguir o reto:

Primeiro, vas participar nunha tarefa de investigación sobre a Rede. Por grupos, teredes que pescudar distintos aspectos das redes sociais e tamén as posibles estratexias e recomendacións para evitar riscos.

Logo de recoller toda a información teredes que facer un traballo cooperativo de selección do máis importante e con iso elaboraredes un díptico dixital que irá incluído no blog que imos deseñar. Para elaborar o díptico seguiredes os seguintes pasos:

Redacción
Revisión
Corrección
Selección de ilustracións e doutro material gráfico ou multimedia
Edición
Maquetación
Publicación
Divulgación

Tamén por grupos, ides elaborar o deseño e planificación do blog de aula, que está composto das seguintes partes:

Cabeceira do blog
Columna principal
Barra lateral
Pé de páxina

Ademais aprenderedes a escribir mensaxes, correos electrónicos e comentarios nun blog.

Tamén teredes que elaborar coa axuda do profesorado unha nova noticia partir de varias versións anteriores. Esta noticia que ides redactar debe respectar os principios de propiedade intelectual.

Para o proceso de creación de textos poderedes utilizar dicionarios, tanto analóxicos como dixitais.

Pero non todo vai ser escribir!

Gravaredes pílulas informativas nas que se dean exemplos concretos nos denuncien e rexeiten os usos discriminatorios da linguaxe verbal e non verbal e os abusos a través da palabra.

Escolleredes ilustracións e fotografías para acompañar os textos (tanto no propio díptico coma no blog).

Unha vez estea elaborado o díptico dixital, enviarédelo a entidades sociais.

As pílulas informativas irán no propio blog e, de ser o caso, tamén poderán publicarse na radio do centro.

Lectura facilitada

Neste proxecto deseñaredes un blog de aula.

Aprenderedes a facer comentarios nun blog.

No blog publicaredes un díptico dixital.

O díptico contén un traballo de investigación en grupo sobre Internet.

Ademais aprenderedes a escribir correos electrónicos.

Logo enviaredes o díptico por correo a entidades sociais.

Ademais aprenderedes a coñecer as partes da noticias e saber interpretalas.

Podedes consultar varios dicionarios para crear noticias.

E tamén:

Faredes gravacións sobre os usos discriminatorios da linguaxe.

As gravacións irán no propio blog.

Audio

Cal é a meta do noso reto?

Celebrar o Día do Consumidor e a Semana da Prensa.
Crear un blog para a mocidade que sirva de palestra para as inquietudes xeradas polo uso das novas tecnoloxías.
Participar nun traballo de investigación colectivo e cooperativo sobre os tipos de redes sociais, os riscos da Rede e a súa prevención.
Elaborar un díptico para a mocidade en formato dixital sobre a Rede.
Coñecer e utilizar tanto dicionarios analóxicos como dixitais para enriquecer as producións.
Gravar pílulas informativas nas que se rexeiten os usos discriminatorios da linguaxe verbal e non verbal, ademais dos abusos a través da palabra.
Redactar unha nova versión sobre unha noticia, logo de contrastar varias noticias con espírito crítico.

Audio

Que vas aprender?

Coñecerás as partes dun blog e aprenderás como publicar nel.
Redactarás textos narrativos sinxelos (mensaxes, correos electrónicos, comentarios nun blog).
Mellorarás as túas estratexias de cooperación conversacional e cortesía lingüística.
Coñecerás os usos discriminatorios da linguaxe e os abusos da palabra, para así poder evitalos e rexeitalos.
Aprenderás a elaborar un díptico en formato dixital.
Fomentarás o teu espírito crítico ante a Rede, coñecendo os seus riscos e as recomendacións para evitalos.
Aprenderás a redactar noticias con espírito crítico a partir de varias versión dunha nova.