Quen traballa aquí?
Para realizar unha representación de música dramática, para que a escena cobre vida ante o público, son necesarios unha variedade de profesionais, ademais dos cantantes e os instrumentistas. Non todo é música!
Seguro que estás pensando quen son pero ao mellor non sabes como se denominan os seus traballos ou hai algún detalle que se che escapa. Imos coñecer as principais funcións deste colectivo de profesionais da cultura:
En toda representación teatral musical sempre hai unha dirección de produción, unha dirección musical e unha dirección de escena (rexedoría). Así que a falta dunha temos tres direccións, incluso podemos ter máis. E entón quen manda?
- A dirección de produción exerce o liderado da representación. É a que organiza o funcionamento das persoas que traballan nela.
- A dirección musical na música escénica está encarnada pola persoa que dirixe a orquestra ou a agrupación musical que acompaña a representación.
- A dirección de escena ou rexedoría encárgase de realizar os ensaios e dirixir as representacións. Nada se move no teatro sen a súa orde.
- Guionistas ou libretistas son as persoas encargadas de escribir a historia que se vai representar.
- Os profesionais da escenografía son as persoas encargadas dos decorados, das mudas dos mesmos e dos "útiles", dos obxectos cos que os intérpretes entran a escena.
- O equipo de estilistas está composto por profesionais de vestiario, peiteado e maquillaxe. Teñen como obxectivo definir cada personaxe polo seu aspecto físico.
- Profesionais da iluminación. Son as persoas encargadas de centrar a atención do público nas diferentes accións que teñen lugar no escenario e facilitar o seu entendemento así como de crear diferentes atmosferas segundo as esixencias do guión.
- Equipo de son. Aínda que na ópera e na zarzuela son practicamente inexistentes, cando a representación se realiza nun teatro ou nun auditorio, si están presentes nos musicais. Do seu "tacto" e coidado no tratamento da recollida de son e posterior emisión dependerá en gran medida a apreciación do público.
Como ves hai moitos e diversos profesionais traballando para que o espectáculo se realice. Podes pescudar máis no tema visitando as seguintes páxinas:
ESCOLA SUPERIOR DE ARTE DRAMÁTICA DE GALICIA (abre nova xanela)
Lectura facilitada
Profesións escénicas:
- Director ou directora de produción: persoa que dirixe a compañía teatral ou de ópera.
- Director ou directora musical: persoa encargada da música. Adoita ser quen dirixe a orquestra.
- Rexedor ou rexedora: persoa que dirixe os ensaios e as actuacións.
- Guionista ou libretista: persoa que escribe a historia.
- Escenógrafos e escenógrafas: persoas encargadas dos decorados.
- Estilistas: profesionais de vestiario, salón de peiteado e maquillaxe.
- Técnicos de luz: profesionais encargados de iluminar o espectáculo.
- Técnicos de son: profesionais encargados de recoller e amplificar o son.
Podes aprender máis nestas páxinas:
ESCOLA SUPERIOR DE ARTE DRAMÁTICA DE GALICIA (abre nova xanela)
