Creade os grupos e parade a pensar: que pasa na vosa contorna? Como afecta o problema da violencia de xénero ás persoas que coñecedes e mesmo a vós? Que opinións hai ao respecto? Farédelo mediante unha chuvia de ideas na que participará toda a clase.

Comprobaredes canto sabedes xa sobre linguaxe visual e composición, completando unha serie de probas en liña.

Aprenderedes que é a linguaxe visual, para que serve e os seus elementos. Tamén sobre composición e os tipos que existen. Logo, poñeredes en práctica o aprendido mediante actividades en grupo e individuais.

Neste intre xa seredes uns expertos e expertas da linguaxe visual e a composición; toca agora recoñecer e analizar diferentes tipos de carteis.

Por fin, chega o momento de poñer en práctica todo o aprendido nesta unidade: crearedes en grupo os vosos propios carteis reivindicativos para a celebración do 25N. Mediante creativos deseños, alzaredes a vosa voz contra a violencia de xénero.

É o momento de amosar as vosas creacións: expoñeredes conxuntamente os vosos carteis e analizaredes os resultados do traballo realizado. Tamén prepararedes unha mostra pública dos carteis na vosa contorna, para que todo o mundo admire a vosa arte!