Glosario

Boato

Noticias falsas: pantalla de ordenador que le noticias falsas

Definición:: Información falsa que se difunde rapidamente e que confunde á poboación xeral sobre un determinado tema.
Exemplo:: É importante non crer en boatos sobre o cambio climático sen antes verificar a información.

Desinformación

O mando a distancia na man cambia a canle do televisor en funcionamento.

Definición:: Difusión intencionada de información falsa ou enganosa, que busca confundir ou manipular a opinión pública.
Exemplo:: A desinformación dificulta a posta en marcha de medidas protectoras do medio ambiente.

Infografía

Definición:: Representación gráfica que combina texto e imaxes para expoñer información de forma clara e sinxela.
Exemplo:: Esta infografía resume de forma clara os tipos de enerxía.

Información científica

Pictograma dunha científica cun microscopio e material de laboratorio

Definición:: Conxunto de datos e coñecementos obtidos mediante experimentos e investigación, baseados en probas reais e comprobados por persoas expertas, que axudan a entender como funciona o mundo.
Exemplo:: A información científica sobre o medio ambiente é importante para comprender como protexer a natureza.

Tríptico

Definición:: Folleto dobrado en tres partes que serve para explicar información dun xeito sinxelo e visual.
Exemplo:: Este tríptico mostra as consecuencias do cambio climático.

Reflexiona antes de comezar

Sabías que cada día estamos expostos a información falsa sobre o cambio climático?

A crise climática é unha realidade que afecta ao noso planeta, pero os boatos e os argumentos negacionistas propáganse rápido, confundindo á xente e atrasando as medidas necesarias para protexelo. É hora de actuar e demostrar, con datos científicos na man, que a verdade é a nosa mellor ferramenta contra a desinformación.

Vista da Terra emerxendo desde a escuridade

Por iso, propoñémosche un reto: convértete nun defensor ou nunha defensora do clima!

En equipo, investigaredes artigos e novas procedentes de fontes fiables para desmontar mitos negacionistas e diferenciar entre argumentos científicos e boatos. Con esa información científica, elaboraredes un póster, unha infografía ou un tríptico, visual e impactante, que presente de forma clara as verdades científicas que desmontan os argumentos falsos.

Os vosos traballos culminarán coa súa divulgación a través dunha presentación na aula, dunha exposición no centro educativo ou dunha charla para a comunidade escolar. Imaxinade o impacto de compartir o voso coñecemento, espertar conciencias e convertervos en referentes na loita contra a crise climática.

O futuro está nas vosas mans! Imos polo reto?

Lectura facilitada

Cada día recibimos información falsa sobre o cambio climático.

A crise climática é real, pero algúns boatos fan que a xente dubide.

Isto atrasa as solucións para protexer o planeta.

Necesitamos datos científicos para combater a desinformación.

Propoñémosche un reto: convértete en defensora ou defensor do clima!

En equipo, investigaredes fontes fiables para desmontar mitos.

Con esa información, crearedes un póster, unha infografía ou un tríptico.

O obxectivo é explicar, de forma clara e visual, as verdades científicas.

Presentaredes o voso traballo na aula, no centro escolar ou nunha conferencia.

O voso coñecemento pode espertar conciencias.

O futuro está nas vosas mans. Imos polo reto?

1.1. Introdución ao reto