5. Glosario

A

• Adobe
  

Ladrillo feito cunha mestura de palla e barro cocida ao sol.

• Agricultura de subsistencia

Tipo de agricultura que proporciona exclusivamente produtos para a alimentación humana, e en especial a que serve para o autoabastecemento do agricultor.

• Asemblea

Conxunto de persoas que se reúnen para tratar algún fin.

C

• Cidade-Estado

Cidade soberana, é dicir, politicamente independente.

• Clases sociais

Distintos grupos de persoas que se definen polo lugar que ocupan nas estruturas económicas, de poder e de prestixio dentro da sociedade á que pertencen. Cada clase diferénciase das outras pola riqueza que posúe e polo grao de poder económico e político que exerce.

• Cultura

Conxunto de ideas, costumes, ciencias, artes, lingua, coñecementos, leis, moral e relixión que caracterizan un grupo social. É a única característica propia da especie humana.

E

• Estado

Territorio no que se recoñece a autoridade suprema dun goberno que dirixe, organiza, controla e administra a vida de todos os habitantes. Outras funcións son o mantemento da paz interior e a defensa contra a agresión exterior a través do control exclusivo do uso da forza (o exército).

F

• Fósiles

Restos de materia orgánica antiga que se conservaron enterrados e petrificados en capas máis ou menos profundas da codia terrestre.

H

• Hominización

Proceso evolutivo polo que os primates se converteron en humanos.

I

• Ideoloxía

Conxunto de ideas fundamentais que forman parte do pensamento dunha persoa, dun conxunto delas, dunha época ou de movementos políticos, culturais ou relixiosos.

M

• Musulmán

Crente seguidor do islamismo.

O

• Oligarquía

Goberno exercido por un grupo reducido de persoas pertencentes ás clases altas e ricas da sociedade.

P

• Politeísta

Relixión que admite varios deuses. Cando posúe un só deus recibe o nome de monoteísta.

R

• Revolución

Cambio rápido e brusco que se dá nunha sociedade, e que trae cambios profundos na economía, na sociedade, na política e na cultura, aparecendo despois unha sociedade radicalmente distinta á anterior.

• Reconquista

Recuperación, por parte dos cristiáns, dos territorios da Península Ibérica ocupados polos musulmáns.