2.1.1 A hominización: o camiño cara ao ser humano

Dentro da escala zoolóxica, a especie humana pertence á orde dos primates, que xurdiron hai 60 millóns de anos. Caracterízanse por teren extremidades longas e rematadas en cinco dedos, ollos dirixidos cara a adiante e cerebro desenvolvido. Dentro deste grupo xurdiron, hai cinco millóns de anos, os homínidos, dos que forma parte a especie humana desde hai máis de dous millóns de anos.

A aparición do ser humano foi un proceso lento e complicado, que se denomina hominización. Coa axuda dos fósiles podemos establecer a súa evolución:

Mantéñense en posición vertical e andan só coa axuda das extremidades inferiores (posición bípede). Quédanlles libres as mans, coas que manipulan obxectos e fabrican ferramentas. Posúen un amplo campo de visión. Auméntalles a capacidade cranial e o volume do cerebro, o que lles permite desenvolver o razoamento, o pensamento, a coordinación dos movementos e a linguaxe, para comunicárense.

A evolución dos homínidos permitiulles coñecer mellor o medio en que se desenvolvían, comezar a dominalo, seren quen de lles transmitir os coñecementos aos seus descendentes e fabricaren instrumentos conscientemente, feito este que diferencia a especie humana do resto dos homínidos.

O Homo habilis, xurdido hai 2.300.000 anos, é considerado o primeiro ser humano, porque fabricaba premeditadamente útiles de pedra tallada. A partir del, a especie humana seguiu evolucionando ata chegar ao actual Homo sapiens sapiens, que, procedente de África, chegou a Europa hai uns 40.000 anos.