1.2.1 Indicadores do desenvolvemento

Produto interior bruto (PIB)

Indicador económico que resulta de calcular todas as actividades económicas realizadas nun país durante un período de tempo: trimestre ou ano. O cálculo do PIB obtense da seguinte suma:

Consumo + investimentos + gasto público + exportacións + importacións

Renda per cápita

Resulta de dividir o PIB entre o número de habitantes dun país. Xa que logo, o crecemento dun país mídese polo aumento do PIB. Este indicador permite clasificar os países en:

• Desenvolvidos economicamente: cando a renda per cápita supera os 6.000 dólares.

• En vías de desenvolvemento: cando a renda per cápita non supera os 6.000 dólares.

• Subdesenvolvidos:cando a renda per cápita non acada os 600 dólares.

O indicador da renda per cápita pode ser enganoso, xa que non recolle variables que se consideran imprescindibles para avaliar o benestar dun país, como a taxa de paro ou a contaminación. En efecto, un país pode duplicar en pouco tempo a súa renda per cápita e, ao tempo, ter aumentado o paro, a pobreza e as desigualdades sociais.

Índice de desenvolvemento humano (IDH)

Indicador socioeconómico elaborado polo Programa das Nacións Unidas para o Desenvolvemento (PNUD). Ten en conta os seguintes factores:

• Vida longa e saudable: esperanza de vida ao nacer.

• Educación: taxa de alfabetización de adultos + taxa bruta (matriculación) na educación primaria, secundaria e superior + anos de educación obrigatoria.

• Nivel de vida digno: Produto interior bruto per cápita en dólares.

O índice de desenvolvemento humano exprésase en valores situados entre 0 e 1:

• Países con desenvolvemento humano alto: IDH ≥ 0,8.

• Países con desenvolvemento humano medio: 0,5 ≤ IDH < 0,8.

• Países con desenvolvemento humano baixo: IDH < 0,5.

O desenvolvemento humano é tal cando logra para as persoas unha vida prolongada e saudable, educación, recursos para un nivel de vida decente, liberdade política, garantía dos dereitos humanos e respecto a si mesmo.

	Nivel alto		Nivel medio		Nivel baixo		Non analizado
Mapa do mundo para o IDH dos Estados, Informe 2007/2008 (PNUD)

Algúns países co seu índice de desenvolvemento humano (2010)
País Primeiro Mundo	IDH	País Terceiro Mundo	IDH
Noruega	0,938	Malí	0,309
Australia	0,937	Liberia	0,300
Estados Unidos	0,902	Chad	0,295
Irlanda	0,895	Mozambique	0,284
Países Baixos	0,890	Burundi	0,282
Canadá	0,888	Nixeria	0,261
Suecia	0,885	Rep. Dem. Do Congo	0,239
Alemaña	0,885
España	0,861	Cimbabue	0,140