1.1.1 Globalización das actividades humanas

O proceso de achegamento e relación das áreas xeográficas da Terra, das actividades económicas, dos recursos, da poboación e das culturas coñécese como globalización ou mundialización. Malia existir gran diversidade cultural no mundo, as novas tecnoloxías tenden a homoxeneizar cada día máis os gustos e os costumes.

A globalización divide a sociedade. Uns pensan que este novo concepto de sociedade fai desaparecer os elementos distintivos. Outros sosteñen que a diversidade e a globalización non son incompatibles e defenden un mundo globalizado multicultural.

O fenómeno da globalización pódese considerar desde varias perspectivas:

• Globalización económica: baséase no desenvolvemento dos procesos económicos no ámbito mundial, con fortes lazos de interdependencia comercial entre os países. O sistema económico globalizado caracterízase por:

• Desenvolvemento do comercio internacional.

• Mundialización da produción.

• Internacionalización dos intercambios financeiros: pagamentos por servizos e mercadorías; tamén movementos especulativos para obter beneficios.

• Grande avance dos transportes e das telecomunicacións que facilitan as conexións rápidas entre calquera lugar da Terra.

• Globalización tecnolóxica. As tecnoloxías da información e da comunicación son importantes pola difusión da información instantánea e inmediata a todo o planeta:

• Microelectrónica, informática e telecomunicacións: xeran cambios tan fondos na sociedade que xa se fala da terceira ou cuarta revolución industrial.

• A prensa escrita diaria compite coa dixital, que se actualiza ao minuto e inclúe imaxes. A televisión transmite a información en tempo real e os usuarios poderán escoller pronto programación á carta.

• Internet ofrece textos íntegros, enciclopedias en liña, blogs... un universo onde o individuo é consumidor e tamén pode ser creador de contidos.

• Globalización sociocultural: as ideas e os costumes móvense a gran velocidade no mundo. A cultura occidental imponse sobre outras, e provoca a perda de formas de vida propias, identificadoras de certos grupos ou rexións do mundo.

• Globalización política: o mundo xa non se organiza só en estados, continentes, civilizacións... O criterio dominante é o dasrexiónseconómicas e as respectivas áreas de influencia: Unión Europea, Estados Unidos, Xapón...