Servizo

A continuación explicamos o servizo de pádel, por ser común tamén a outros deportes de pa e cancha dividida.

1. Colócate por detrás da liña de fondo.
2. O pé do lado non dominante colocarase adiante e o lado dominante atrás.
3. Suxeita a pelota coa man non dominante e a pa coa man dominante.
4. Antes de soltar a pelota ten o brazo preparado. Colócase atrás, lixeiramente flexionado, pero cunha subxección firme da pa.
5. Deixa caer a pelota e tralo bote golpea esta cun movemento da pa de atrás cara adiante.
6. O golpe debe ser por debaixo da cintura e ir en dirección diagonal cara ao cadro oposto. Debe botar dentro do cadro. 

O pickleball tamén comparte este tipo de saque e as mesmas normas, pero a maiores, ofrece a posibilidade de facer o servizo sen bote. Igualmente, para este tipo de saque, exceptuando o bote, o resto de premisas serían comúns.

"Drive"

O drive, tamén chamado dereita, é un golpe que se executa a media altura e cunha traxectoria horizontal e tensa. Execútase, sobre todo, dende zonas posteriores da pista e tras bote previo da pelota. Para realizalo ten en conta os seguintes pasos:

1. Colócate lateral á zona á que vas dirixir o golpe. O lado non dominante do corpo estará adiantado.
2. Mantén o centro de gravidade baixo os xeonllos lixeiramente flexionados para ter unha posición relaxada e estable.
3. Arma a pa: coloca a pa detrás preparada para facer un golpe cara adiante.
4. Golpea a pelota cando se atopa lixeiramente por diante do corpo.
5. Evita unha tensión excesiva no brazo e empuñadura ao golpear.
6. Acompaña o golpe co corpo e os ombreiros. Tralo golpe deixa ir o brazo.

Revés: Este mesmo golpe pode executarse polo lado non dominante a unha ou dúas mans. As premisas técnicas serán as mesmas, tendo en conta que o lado dominante do corpo cruza por diante ao lado non dominante, quedando polo tanto o corpo rotado co brazo e perna dominante adiantados.

Deixada

As deixadas son golpes suaves e precisos co obxectivo de que a pelota pase por encima da rede e quede preto dela. É habitual realizalas cun golpe a mans baixas ou a media altura, pero tamén se pode executar a mans altas.

En función de se o realizas de dereita ou de revés comparte características xa descritas, pero a maiores debes ter en conta:

1. Executar un golpe suave e controlado. O movemento do brazo e pa será máis curto.
2. A dirección do brazo no golpe será lixeiramente ascendente.
3. A pa pode orientarse lixeiramente cara arriba co obxectivo de controlar máis o golpe e que o bote sexa máis vertical.

Remate

O remate, tamén chamado smash, é  un golpe forte, tenso, que se executa por encima da cabeza e que, cunha traxectoria descendente, busca gañar o punto. É polo tanto o principal golpe ofensivo.

Tamén é importante percibir ben as condicións nas que se recibe a pelota para tomar a decisión de executalo. Polo xeral, execútase ante globos do rival que se quedan curtos. 

Para facelo con éxito segue os seguintes pasos:

1. Colócate en posición lateral, co pé do lado non dominante adiantado.
2. Ao preparar o golpe, o peso do corpo debe estar sobre a perna de atrás.
3. Eleva os dous brazos. O brazo de golpe armado, é dicir, flexionado, coa pa detrás da cabeza e o agarre firme. O brazo libre elevado axudará a equilibrar o movemento.
4. Debes colocarte debaixo ou lixeiramente detrás da pelota.
5. Cando a pelota se atope á altura adecuada, xira o corpo golpeando cun movemento tenso e firme do brazo e coa pa orientada lixeiramente cara abaixo para conseguir a traxectoria descendente.
6. Debes golpear a pelota por encima da cabeza. Ao golpear máis alto reduces a probabilidade de que a pelota quede na rede.

Volea

É un golpe que se caracteriza por executarse sen bote previo. Realízase cando se sube a parte adiantada da pista e ten por obxectivo dificultar o xogo do rival. Ten en conta o seguinte:

1. Pode executarse de dereita ou de revés.
2. Ao realizarse na parte dianteira da pista, redúcese o tempo para a colocación previa do corpo. A rotación previa do corpo será menor.
3. Ao ter menos acompañamento do corpo, é un golpe onde predomina o control e non tanto a potencia.
4. O movemento será máis ben rápido, curto e firme (seco).

Globo

O globo é un golpe defensivo que se caracteriza por enviar a pelota cara ao fondo de pista cunha traxectoria ascendente e alta. Con este golpe búscase gañar tempo e desprazar ao rival lonxe da rede. Para executalo correctamente, ten en conta o seguinte:

1. Adoita realizarse despois dun bote para facilitar o control e precisión.
2. O movemento do brazo é ascendente e a pa orientase cara arriba.

Ollo! O globo debe ser un golpe preciso, pois se queda curto deixarás a pelota en condicións de que o teu rival faga un remate, con moitas probabilidades de que che gañe o punto.