Unha comisión é un subgrupo de persoas que se crea para tratar un tema concreto, tomar decisións ou realizar unha tarefa determinada.
Exemplo:
Os comités olímpicos teñen comisións que se encargan de tarefas concretas.
Valor olímpico
Definición:
É unha cualidade ou principio que orienta o comportamento das persoas deportistas olímpicas e axuda a mellorar a convivencia e as relacións entre elas.
Exemplo:
A solidariedade é un valor olímpico, xa que promove a axuda ás outras persoas cando o necesitan.
As comisións olímpicas
Duración: 10 minutos Agrupamento: Gran grupo
Antes de comezar, cómpre organizarse por equipos.
Este é o primeiro paso para traballar de xeito eficiente.
No Comité Olímpico Galego (COG), estes grupos chámense comisións.
Estás a piques de coñecer os integrantes da túa comisión.
Só tes que seguir estes pasos:
1. Etiquétate
A persoa docente entregarache unha tarxeta na que estará escrito algún dos seguintes valores e principios olímpicos: amizade, respecto, excelencia, non discriminación e solidariedade.
2. Quenta
Móvete libremente polo espazo, realizando carreira a intensidade baixa e engadindo o exercicio de quecemento que indique a persoa docente en cada momento. Por exemplo:
Skipping.
Contraskipping.
Desprazamentos laterais.
Carreira a intensidade baixa cara atrás.
3. Intercambia
Cada vez que a persoa docente diga o sinal: "A seus postos, listos, xa!", deberás buscar a un/unha compañeiro/a con quen intercambiar a túa etiqueta; é obrigatorio.
4. Repite
Volve moverte libremente pola sala realizando os movementos que che indique a persoa docente ata que che dea o sinal de intercambio da nova etiqueta.
Repetirás isto 3 ou 4 veces ata que a persoa docente indique o final da actividade.
5. Agrúpate
Cando a persoa docente sinale o final da actividade, deberedes agruparvos por etiquetas, é dicir, todas as persoas que teñan o mesmo valor olímpico formarán unha comisión.
Lectura facilitada
Duración: 10 minutos Agrupamento: Gran grupo
Tedes que formar equipos.
No Comité Olímpico Galego (COG), estes equipos chámanse comisións.
Estás a piques de coñecer as persoas integrantes da túa comisión.
Sigue estes pasos:
1. Etiquétate
A persoa docente darache unha tarxeta.
Na tarxeta estará escrito un dos seguintes valores e principios olímpicos:
Amizade.
Respecto.
Excelencia.
Non discriminación.
Solidariedade.
2. Quenta
Móvete libremente polo espazo.
Corre a intensidade baixa.
Engade os exercicios de quecemento que indique a persoa docente, por exemplo:
Skipping.
Contraskipping.
Desprazamentos laterais.
Carreira cara atrás.
3. Intercambia
Cada vez que a persoa docente diga o sinal:
“A seus postos, listos, xa!”
Debes buscar un/unha compañeiro/a con quen intercambiar a túa etiqueta.
É obrigatorio facelo.
4. Repite
Móvete libremente pola sala.
Fai os movementos que indique a persoa docente.
Espera ao sinal de intercambio da nova etiqueta.
Repite isto 3 ou 4 veces.
Para a actividade cando a persoa docente diga o final.
5. Agrúpate
Cando a persoa docente diga o final da actividade, agrupádevos por etiquetas.
Todas as persoas que teñan o mesmo valor olímpico formarán unha comisión.
Audio
Sentando as bases
Para que vos coñezades mellor e comecedes a recuperar os coñecementos que darán pé ao deseño das probas olímpicas, realizaredes as seguintes actividades por grupos, é dicir, traballando coas persoas integrantes de cada comisión.
Lectura facilitada
Para coñecervos mellor e repasar coñecementos, faredes actividades en grupo.
Traballaredes coas persoas da vosa comisión.
Audio
Remudas memorísticas
Duración: 15 minutos Agrupamento: Pequeno grupo
Que lembrades sobre o atletismo?
Este é un dos deportes para os que teredes que deseñar e elaborar probas selectivas. Así que poñédevos a proba neste xogo de remudas, no que non só a velocidade física é a protagonista, senón tamén a mental…
Cal será a comisión máis rápida?
1. Escolle e sitúate na liña de saída
A persoa docente entregará a cada grupo un lote de tarxetas escritas con conceptos relativos a probas de atletismo, por exemplo "4 x 100". Unha persoa de cada grupo debe escoller unha tarxeta e situarse na liña de saída, na posición asignada ao seu equipo.
2. Corre e deixa a tarxeta
En fronte a cada grupo teredes 3 aros, cada un deles asociados a un destas categorías de probas:
Saltos.
Lanzamentos.
Carreiras.
Cada persoa participante terá que correr coa tarxeta na man e depositala no aro que corresponda. Por exemplo, se a súa tarxeta pon "carreira", terás que colocala no aro de "Carreiras".
3. Completa a remuda
Unha vez colocada a tarxeta, a persoa participante regresará á saída para darlle o "cambio" a outro membro da súa comisión, que deberá estar agardando cunha tarxeta seleccionada e facer o mesmo. O xogo manterase así sucesivamente até que todas as tarxetas se coloquen nun dos aros.
4. Os resultados
O xogo finalizará cando todos os grupos teñan colocadas todas as tarxetas.
Lectura facilitada
Duración: 15 minutos Agrupamento: Pequeno grupo
Que lembrades sobre o atletismo?
Teredes que deseñar e elaborar probas selectivas para este deporte.
Poñédevos a proba neste xogo de remudas.
Non só conta a velocidade física, senón tamén a mental.
Cal será a comisión máis rápida?
1. Escolle e sitúate na liña de saída
A persoa docente dará a cada grupo un lote de tarxetas.
As tarxetas levarán escritos con conceptos de atletismo, por exemplo, "4 x 100".
Unha persoa de cada grupo debe escoitar unha tarxeta.
Esa persoa colócase na liña de saída, na posición do seu equipo.
2. Corre e deixa a tarxeta
En fronte a cada grupo hai 3 aros, un para cada tipo de proba:
Saltos.
Lanzamentos.
Carreiras.
Cada persoa corre coa súa tarxeta na man.
Debe depositala no aro correcto.
Por exemplo: se a tarxeta pon "carreira", vai no aro de "Carreiras".
3. Completa a remuda
Unha vez colocada a tarxeta, a persoa participante regresa á saída.
Dá o cambio a outro membro da súa comisión, que agarda cunha nova tarxeta.
Esa persoa repite o mesmo proceso.
O xogo continúa así até que todas as tarxetas estean colocadas nos aros correctos.
4. Os resultados
O xogo remata cando todos os grupos teñan colocadas todas as tarxetas.
Audio
Descubre e ordena
Duración: 15 minutos Agrupamento: Pequeno grupo
Nun proceso selectivo, a intuición pode xogar un papel importante xunto coas habilidades e os coñecementos.
Cal das vosas comisións é a que ten máis intuición? Comprobádeo na seguinte actividade, que ademais vos servirá para repasar as fases do quecemento, un aspecto fundamental nas probas que deseñaredes.
Quentade que saídes!
1. Punto de partida
Nesta actividade cada comisión terá unha zona de saída e a persoa docente terá 10 conos dentro do círculo central da cancha de fútbol sala (ou alternativa), así como unhas tarxetas cunha proposta de 5 fases do quecemento.
2. Contra a parede
Distribuídos nas comisións, debedes colocarvos en fila e mirando cara a parede até que a persoa docente vos avise. Durante este tempo, a persoa docente esconderá a tarxeta debaixo dun cono, sen que ninguén o vexa.
3. Adiviña
Ao sinal da persoa docente, sairedes os primeiros de cada comisión. Deberedes chegar até un cono e levantalo:
Quen atope a tarxeta, gaña esa ronda. A tarxeta irá para o seu grupo e comezarase unha nova ronda.
Se ninguén atopa a tarxeta, regresaredes á saída para darlle o cambio á outra persoa da comisión que terá unha nova oportunidade para atopar a tarxeta. Será así até que alguén atope a tarxeta.
4. Lembra as fases
A persoa que atopa a tarxeta indicará que fase do quecemento acaba de atopar e unha persoa de cada comisión a anotará nun papel.
5. Resolve
Cando as 5 fases estean atopadas e compartidas, a persoa docente daravos tempo para poñelas na orde correcta.
6. Resultados
Para finalizar, a persoa docente supervisará e indicará que grupos colocaron as fases na orde correcta.
Lectura facilitada
Duración: 15 minutos Agrupamento: Pequeno grupo
Nun proceso selectivo, a intuición é importante.
Tamén o son as habilidades e os coñecementos.
Cal comisión ten máis intuición?
Comprobádeo nesta actividade.
Esta actividade tamén serve para repasar as fases do quecemento.
Quentade que saídes!
1. Punto de partida
Cada comisión terá unha zona de saída.
A persoa docente colocará 10 conos no círculo central da cancha de fútbol sala (ou outro espazo similar).
Tamén haberá tarxetas coas 5 fases do quecemento propostas.
2. Contra a parede
Distribuídevos en comisións.
Colocádevos en fila mirando cara á parede.
Esperade ata que a persoa docente avise.
Durante ese tempo, a persoa docente esconderá a tarxeta debaixo dun cono sen que ninguén o vexa.
3. Adiviña
Ao sinal da persoa docente, sae o primeiro de cada comisión.
Debe chegar a un cono e levantalo.
Quen atope a tarxeta gaña esa ronda.
A tarxeta vai ao seu grupo e comeza unha nova ronda.
Se ninguén atopa a tarxeta, volve á saída e dá o cambio a outra persoa da comisión, que terá nova oportunidade.
Repítese até que alguén atope a tarxeta.
4. Lembra as fases
A persoa que atopa a tarxeta di que fase do quecemento é.
Unha persoa de cada comisión anota esa fase nun papel.
5. Resolve
Atopadas e compartidas as 5 fases.
A persoa docente dará tempo para poñelas na orde correcta.
6. Resultados
Para rematar, a persoa docente supervisará.
Indicará que grupos puxeron as fases na orde correcta.
