Saltar navegación

4.1. Reto 1: Describimos personaxes

Describimos personaxes

Este primeiro reto consiste na descrición de persoas, pero debemos de seguir uns pasos para a consecución do reto (no apartado do Reto 3 atoparedes as listas de control correspondentes a cada xogo).

1. Acordar no grupo que xogo se vai crear:

  • Quen é quen?
  • Carta arriba
  • Memoriza

2. Acordar as persoas que van ser descritas no xogo:

  • Persoas famosas da cultura galega.
  • Persoas coñecidas da vosa localidade ou barrio.
  • Persoas usuarias dunha residencia de maiores.

3. Elaborar unha lista:

  • Elaborar unha lista cos 15 nomes de quen van ser os personaxes do xogo (os protagonistas do xogo).
  • Podedes elixir os nomes das listas "Suxestións" (que atoparedes máis abaixo) ou ben pensar noutras persoas diferentes. 

4. Investigar:

  • En Internet sobre persoas famosas.
  • Preguntando na casa ou na rúa sobre persoas da localidade.
  • Preguntando de xeito presencial na residencia de maiores ás persoas usuarias ou isto mesmo de xeito indirecto, solicitando a colaboración e mediación dos traballadores e das traballadoras do centro.

5. Realizar un borrador:

  • Realizar un borrador coa descrición destes 15 personaxes salientando os seus aspectos máis característicos.
  • Empregar unha linguaxe inclusiva (o xénero modifica adxectivos e substantivos), respectuosa (descartade o que puidera ofender) e obxectiva (sen dar opinións).
  • Seguir unha orde na descrición (físico dende cabeza aos pés, personalidade, traxectoria persoal e profesional, gustos e afeccións).

6. Revisar

  • Revisar o traballo realizado neste reto por parte de todo o grupo.

Apoio visual

Acordar Acordar xogo a elaborar.

Acordar Acordar tipo de personaxes do xogo.

Lista Elaborar lista personaxes.

Investigar Investigar sobre as persoas da lista.

Escribir Escribir descricións.

Revisar Revisar o traballo.

Suxestión de persoas da cultura galega

  • Alberto Mancebo
  • Ana Peleteiro
  • Ángel Carracedo
  • Ángeles Alvariño
  • Belén Regueira
  • Carlos Casares
  • Diego AS
  • Domingo Fontán
  • Fina Casalderrey
  • Isaac Díaz Pardo
  • Iván Ferreiro 
  • Lidia Cao 
  • Luis Tosar
  • Luis Suarez Miramontes
  • Manuel Rivas
  • María Rúa Rodríguez (Prado Rúa)
  • María Vázquez
  • María Xosé Silvar (Sés)
  • Mario Brión Toucedo (Olaxonmario)
  • Maruja Mallo
  • Rosalía de Castro
  • Yolanda Castaño

Suxestión de persoas da localidade ou do barrio

  • Mestre ou mestra
  • Gandeira ou gandeiro
  • Bibliotecario ou bibliotecaria
  • Alcaldesa ou alcalde
  • Farmacéutico ou farmacéutica
  • Activista
  • Panadeira ou panadeiro
  • Froiteiro ou froiteira
  • Carniceira ou carniceiro
  • Carteiro ou carteira
  • Camareira ou camareiro
  • Deportista
  • Repartidor ou repartidora
  • Empresaria ou empresario
  • Enfermeiro ou enfermeira
  • Doutora ou doutor
  • Músico ou música
  • Cantante
  • Profesor ou profesora
  • Adestradora ou adestrador
  • Concelleiro ou concelleira
  • Peixeira ou peixeiro
  • Condutora ou condutor de bus
  • Taxista

Exemplos de descrición de personaxes

Persoa coñecida (Belén Regueira)

Belén Regueira

Belén Regueira é unha xornalista nada na Coruña o 1 de setembro de 1977. Ten o pelo longo e escuro, aínda que en ocasións o tivo loiro e recortado coma un floco. Ten os ollos marróns e cando ri teñen unha forma alongada. Ten a pel clara e o nariz coa punta redondeada. 

É unha persoa sociable, aberta e amable.

Estudando xornalismo, comezou a traballar nun programa de música e entrevistas chamado Chambo e máis tarde foi presentadora e reporteira de espazos informativos. Recibiu o galardón Mestre Mateo á mellor comunicadora polo programa O país dos ananos no ano 2008.  Na actualidade traballa na radio e preside a Xunta de Goberno do Colexio Oficial de Xornalistas de Galicia.

Entre as súas afeccións, destaca pasear polo monte e pola beira do mar, compartir o tempo coa xente que aprecia ou aprender sobre aquilo que lle interesa.

Fontes consultadas:

Persoa da localidade (froiteiro)

Froiteiro

É un home de 29 anos nado en Pontedeume. Ten os ollos pequenos e o pelo curto, crecho e castaño. O nariz é pequeno e ás veces leva pendentes nas orellas. É alto e delgado e adoita vestir prendas de cor branca. 

É unha persoa reservada, pero empática e paciente.

Estudou Filoloxía Galega en Santiago de Compostela, mais agora traballa nunha tenda da localidade que está situada nun edificio rehabilitado recentemente. Na actualidade cambiou o deseño interior da tenda, empregando moita madeira nas paredes e mobles.

Gústalle facer escalada e montañismo, ademais de colaborar con asociacións que protexen o medio ambiente.

Persoa usuaria da residencia (Amelia)

Avoa

É unha muller con pelo curto e branco. Ten ollos claros pequenos e leva lentes. É alta e delgada e adoita levar roupa de cor violeta e azul.

É unha persoa falangueira e, ás veces, un pouco testana.

Traballou durante 25 anos nunha cooperativa gandeira da parroquia de Bastavales. Hoxe é usuaria da residencia de maiores de Brión.

Gústalle pasear pola natureza ademais de xogar ás cartas e outros xogos de mesa con amizades e familia.

.

Lectura facilitada

Belén Regueira naceu na Coruña.

Ten o pelo longo e escuro.

Ten os ollos marróns.

Estudou xornalismo e gañou un premio Mestre Mateo.

Gústalle pasear polo monte.

Este froiteiro é de Pontedeume e ten 29 anos.

Ten os ollos pequenos e o pelo curto.

É alto e delgado.

Estudou Filoloxía Galega pero traballa nunha tenda.

Gústalle a escalada e o montañismo.

A muller ten o pelo curto e branco.

Ten os ollos claros.

Foi gandeira durante 25 anos.

Gústalle pasear pola natureza.

Como obter información para as descricións

  • Para buscar información en Internet e en galego, buscade o nome da persoa e engadide algunha palabra que axude nesta busca, por exemplo:

"Belén Regueira galego", "Belén Regueira biografía", "Belén Regueira entrevista" etc.

  • Para obter información sobre as persoas da localidade e da residencia de maiores, preparade unha lista con preguntas cuxas respostas vos axuden a crear as descricións, por exemplo:

Canto mide? Onde naceu? Tivo algún traballo anterior a este? Que lle gusta facer no seu tempo libre?

Lectura facilitada

Buscamos en Internet usando palabras clave:

"Belén Regueira galego"

"Belén Regueira biografía"

Temos que prepara unha lista de preguntas para as persoas da residencia.

Estas respostas axudarannos a crear as descricións.

Canto mide? Onde naceu? Tivo algún traballo anterior a este?

Creado con eXeLearning (Ventana nueva)