2.3.3 A outra banda do Íberr

MALEN

Non podo seguir a ler. Así non son capaz.

Coloca o libro sobre a mesa

Tantas voces na rúa, esmáganme. Todo o santo día a berros, minuto a minuto, segundo a segundo... E por se abondo non fose, agora, eses ditosos rapaces.

Óise un boureo embaixo

Aborrézoos.

Aproximándose a erguer un mainel

Xa chega o vento da Foz até as casas. Podo sentir como rube cara aos mesmos tellados. Ás veces, é doce recoller o aire de lonxe que anuncia o Río.

Di a modo, asomándose

As dez e nin tan sequera unha estrela... Como pode ser tan allea a nós unha noite de primavera?...

VELLO MARJ

Os ceos da nosa Galandia eran ben distintos. Cóbado con cóbado, cabían moitas cousas polas noites.

MALEN

Hoxe o vento ven xordo e bruador.

VELLO MARJ

Non ten ouvidos o vento, nin falta que aquí lle fan.

MALEN

Tratando de outear algo dende a fiestra

Coido que pola banda do Parque Municipal se abrigan uns longos anacos de nubes. Logo irá descargar.

VELLO MARJ

E non serán os ramallos?...

MALEN

Quizá algún paxaro faga niño; quizá algunha parella de namorados ande a amarse puramente. Eu, desde aquí, nada vexo.

VELLO MARJ

Aínda parece inverno.

MALEN

Si que é estraño este aire. Unha xamais sabe se apunta ao Norte ou ao Sur. Anda revolto. Unha xamais sabe como haberá que chamarlle.

Torres, Xohana, A outra banda do Íberr, Galaxia, Vigo, 1965