2.2.1 A instancia (aspectos teóricos)

É un documento mediante o que realizamos unha petición escrita dirixida a algunha das administracións públicas: local (un concello), provincial (a deputación), autonómica (un organismo dependente da Xunta de Galicia) ou central (un organismo dependente do Goberno central; por exemplo, a Policía Nacional).

A linguaxe da instancia, dado o carácter oficial do escrito, deberá respectar de forma estrita unhas determinadas normas:

• Lingua: non se deben empregar coloquialismos, e hai que utilizar as fórmulas e abreviaturas propias da linguaxe administrativa.

• Tratamento empregado: cando a instancia se dirixe a alguén que ocupa un cargo concreto, deberase empregar o tratamento acaído.

• Forma de presentación: ten unha estrutura fixa; as partes e a orde en que se presentan é a mesma en todas as solicitudes.

Con frecuencia os organismos dispoñen de modelos impresos de instancia para usos concretos, nos que só é preciso cubrir os datos requiridos; noutros casos deberemos redactala nós mesmos acomodándonos sempre á mesma estrutura.

Partes dunha instancia

• Encabezamento ou introdución: na primeira parte da instancia figuran os datos persoais da persoa que lle fai esta solicitude á Administración: o nome e os dous apelidos, o número de DNI, lugar e data de nacemento (non sempre aparece), profesión (non sempre aparece), enderezo (non sempre aparece) e teléfono. Debe incluírse toda a información salientable en relación coa solicitude.

• Corpo ou comunicación: esta parte contén a petición que fai a persoa solicitante coas razóns e os motivos en que se apoia. O corpo divídese en dúas partes:

• Exposición. Nela aparece o motivo ou motivos da petición. Esta parte vai precedida pola palabra expón(ou expoño), escrita en letras maiúsculas, e seguida por dous puntos e á parte. Nas liñas seguintes aparecerá o motivo ou motivos en que se apoia a petición.

• Solicitude. Aquí aparece o contido da petición. Comeza coa fórmula solicita(ou solicito) en maiúsculas. Fíxese na persoa do verbo; as instancias, igual que as solicitudes, redáctanse en primeira ou terceira persoa do singular (expoño en 1ª persoa / expón en 3ª persoa; solicito en 1ª persoa / solicita en 3ª persoa).

• Pé, remate ou final: consta sempre dos seguintes alíneas:

• Lugar e data: da solicitude.

• Sinatura: da persoa solicitante.

• Cargo da Administración: a quen se dirixe a instancia. Neste apartado débese indicar o organismo do que é xefe ou máximo responsable, escrito sempre en letras maiúsculas, e coa forma de tratamento que lle corresponde a ese cargo.

Instancias especiais

Dentro das instancias diferenciaremos dous tipos especiais:

• Recurso de reposición. É unha segunda instancia que se dirixe a un organismo cando este denegou o que se solicitaba ou pedía nunha instancia anterior.

• Recurso de alzada.É unha instancia dirixida a un organismo cando o de xerarquía inmediatamente inferior rexeitou unha petición que se considera xusta pola nosa parte.

Este tipo de instancias elabóranse da mesma maneira que unha normal, pero na alínea dedicada á petición debemos salientar que se trata dun recurso de reposición ou ben dun recurso de alzada.