1 - Introdución

Descrición da unidade didáctica

Esta unidade denomínase "As linguas e as súas variedades". É recomendable que diariamente traballe con ela entre unha e dúas horas.

•   Ademais, debe ter en conta as seguintes puntualizacións:

–      A unidade contén textos e exercicios en galego e castelán, separados en dúas partes ben diferenciadas. Ambas as linguas, xunto coa estranxeira, intégranse no ámbito da comunicación.

–      A unidade consta de dous tipos de textos ou contidos: uns que levan a etiqueta de "aspectos teóricos", que son os que debe comprender e memorizar, e outros que carecen desa etiqueta, que son os que debe ler, comprender e comentar (aparecen precedidos do símbolo &).

–      Os contidos e exercicios van clasificados en bloques ou partes, relacionados con distintos aspectos do estudo da lingua: comunicación oral, comunicación escrita, coñecemento da lingua, lingua e sociedade e educación literaria.

• Logo de rematada a unidade deberá ser quen de:

–      Recoñecer e manexar adecuadamente os elementos paraverbais e non verbais que forman parte das intervencións orais.

–      Coidar a presentación dos textos escritos que presente, en soporte tanto impreso como dixital, atendendo ás normas ortográficas, gramaticais e tipográficas.

–      Diferenciar as características da lingua oral e da lingua escrita.

–      Coñecer a lexislación esencial que existe sobre a lingua galega.

–      Desenvolverse adecuadamente nos diferentes rexistros da lingua segundo o contexto en que se atope.

–      Desenvolverse de forma máis adecuada na capacidade lectora e usar os coñecementos adquiridos sobre literatura para unha mellor comprensión dela e do mundo.

–      Recoñecer e usar adecuadamente as normas de acentuación gráfica.

–      Identificar os substantivos e os adxectivos e as normas básicas de formación do feminino e do plural.