Agora dividirédesvos en grupos, e cada grupo deberá simular as 5 seguintes emerxencias. En cada emerxencia, haberá unha persoa que sexa a que simule o accidente e unha ou varias persoas que atendan á vítima. Tede en conta que cada un de vós debe participar en algunha das emerxencias.
Caso práctico 1
Xogando ao fútbol no tempo do recreo, dúas rapazas saltan para rematar un balón coa testa e as súas cabezas chocan de xeito brusco. Unha delas cae ao chan e non responde.
A quen atenderías en primeiro lugar? E como atenderías ás dúas rapazas?
Caso práctico 2
Unha rapaza atópase almorzando na hora do recreo. De súpeto, leva as súas mans á gorxa e, a pesar de que intenta respirar, non o consegue. Como actuarías?
Caso práctico 3
Despois de soar o timbre de inicio do recreo, un rapaz sae correndo e antes de saír da clase tropeza coa pata dunha mesa e cae ao chan de xeonllos. Presenta unha ferida no xeonllo.
Como atenderías a este rapaz?
Caso práctico 4
Xogando ao baloncesto na clase de Educación Física, unha pelota golpea o nariz dun rapaz e comeza a saír moito sangue polo seu nariz. Como actuarías?
Caso práctico 5
Entras no ximnasio e ves a unha persoa tirada no chan que non se move. Que pasos debes seguir?
