A rúa é o espazo común da vosa vila. Cando atopades lugares e obxectos estragados ou desfeitos... aféctavos? De seguro que non vos gusta atopar lixo, pintadas ou muros a medio facer. En Galicia deuse en chamar feísmo a unha forma peculiar de entender a arquitectura e o urbanismo preocupándose máis polo uso que pola estética do construído. Malia ser algo que poderíamos defender como noso, é importante tomar conciencia da necesidade de coidar os espazos que empregades vós e outras persoas.

Tedes un reto que facer e queredes facelo do mellor xeito posible, verdade? 

A arte ten a capacidade transformadora que precisades. En especial, a arte urbana, coas técnicas artísticas que emprega e a súa linguaxe dinámica, permitiravos deseñar intervencións atractivas e interesantes.

O obxectivo é que xuntos, poidades achegar ideas e solucións para facer da vosa vila un lugar máis fermoso, na que a arte e a creatividade xoguen un papel importante na mellora da vosa contorna.

Atención que ides aprender moito!