Que é?

É a capacidade de manter o esforzo durante un longo período de tempo.

Por exemplo, correr durante un bo intre sen cansarse demasiado.

Métodos de traballo

Que podedes facer para mellorar a vosa resistencia cardiovascular e muscular?

- Xogos de carreiras ou persecución como o "pilla pilla".

- Circuítos con estacións nas que teñades que desprazarvos superando obstáculos, facer abdominais, saltos, carreiras...

- Correr, nadar, pedalear, patinar, bailar... de forma continua a un ritmo suave. Tamén actividades a un ritmo mais forte facendo pequenos descansos.

- Deportes nos que tedes que estar en continuo movemento como fútbol, baloncesto, balonmán...

Necesidade e importancia

A resistencia ten diversos efectos beneficiosos sobre o organismo, como son:

- Incremento da capacidade respiratoria, mellorando o ritmo e a profundidade, pois hai máis ventilación.

- Redución das graxas do corpo, ao empregarse como combustible enerxético. Isto leva a unha diminución do peso corporal e, por conseguinte, da obesidade.

- Prevención de certas enfermidades, como os infartos ou anxina de peito.

- Mellora a capilaridade e a vascularización do músculo.

- Diminución da tensión arterial, ao aumentar a elasticidade dos vasos sanguíneos e a ofrecer estes menos oposición ao paso da sangue.

- Aumento do tamaño do corazón e das súas cavidades-

Que é?

É a capacidade que ten o corpo para mover ou resistir obxectos.

Un exemplo sería levantar unha mochila pesada ou empuxar unha porta.

Métodos de traballo

Que podedes facer para aumentar a forza dos vosos músculos?

- Calistenia ou exercicios co voso corpo: flexións, abdominais, colgarse dunha barra, trepar, sentadas, burpees, ponte de glúteos...

- Xogos nos que teñades que tirar ou empuxar: soga tira, xogos de loita, relevos por equipos arrastrando a unha persoa que está enriba dun xergón...

- Circuítos con estacións nas que teñades que facer exercicios de forza: lanzamentos, saltos, cargar ou mover obxectos ou persoas, exercicios de calistenia...

Necesidade e importancia

Algúns efectos beneficiosos sobre o organismo dun traballo de forza ben realizado son:

- Mellora da actitude postural, ao incrementar o ton muscular.

- Prevención de enfermidades relacionadas coas posturas inadecuadas do corpo e o retraso da aparición de enfermidades dexenerativas como a artrose.

- Aumento da hipertrofia (maior grosor das fibras musculares), o que permite levar a cabo actividades da vida cotiá que implican a aplicación dunha forza sen lesionarse.

- Mellora da estética corporal e do concepto que un ten de si mesmo, encontrándose a persoa máis a gusto física e psicoloxicamente.

- Maior rendemento na realización de tarefas.

- Incremento da resistencia de ósos ás traccións.

Que é?

É a capacidade de mover as articulacións nun rango amplo de movemento.

Un exemplo sería poder tocar os pés coas mans sen dobrar os xeonllos.

Métodos de traballo

Que podedes facer para mellorar a amplitude de movemento das vosas articulacións?

- Estiramentos dinámicos como os que facedes nos vosos quecementos.

- Estiramentos estáticos como os que facedes nas partes finais das sesións. 

- Estiramentos pasivos nos que estades relaxados e outra persoa axúdavos a estirar.

- Actividades que vos obrigan a facer e manter posicións con amplos estiramentos. 

- Xogos nos que tedes que facer amplos movementos, como o xogo do "espello". 

Necesidade e importancia

A flexibilidade é necesaria para:

- Chegar aos límites de calquera rexión corporal, sen deterioro desta e de forma activa.

- Aliviar a dor muscular. O estiramento gradual é efectivo na redución da dor muscular. Tanto durante un exercicio como despois.

- Evitar lesións, tanto musculares como articulares.

- Exercer mellor a nosa forza.

- Diminuír o estrés.

- Estar en forma, xa que determinadas actividades necesitan desta capacidade.

Que é?

É a capacidade de facer algo rapidamente.

Como cando corredes para chegar rapidamente á meta ou para evitar que algo vos alcance.

Métodos de traballo

Que podedes facer para mellorar a vosa velocidade?

- Sprints curtos duns 20 - 50 metros  a máxima velocidade.

- Xogos de carreiras e relevos.

- Xogos de persecución como o "pilla pilla".

- Xogos de reacción como "cara-cruz", "Simón di"....

- Exercicios de forza das pernas: multisaltos, skipping, zancadas explosivas...

Necesidade e importancia

Un bo desenvolvemento da velocidade vai ter os seguintes efectos beneficiosos sobre a saúde:

- Aumentar a atención e a concentración para reaccionar en numerosas ocasións da vida cotiá.

- Permitir levar a cabo movementos coa suficiente rapidez e eficacia.

- Estimular o Sistema Nervioso e retrasar a perda de coordinación relacionada co envellecemento.