Características xerais

Os animais vertebrados son organismos cordados que teñen un esqueleto interno formado pola columna vertebral.

A simetría do seu corpo é bilateral.

Algúns teñen extremidades (ás, aletas, patas) e estruturas protectoras arredor do seu corpo (plumas, pelo, cornos e moitas mais).

Na actualidade calcúlase que hai aproximadamente 50.000 especies de animais vertebrados no planeta.

Están adaptados a unha gran diversidade de hábitats acuáticos e terrestres.

Peixes, anfibios e réptiles son ectotermos.

Son ectotermos porque non son capaces de regular a súa temperatura corporal e dependen da do medio no que viven.

Aves e mamíferos son endotermos.

Son endotermos porque manteñen unha temperatura corporal estable independentemente da do medio no que viven.

Funcións vitais

Nutrición:

A súa nutrición é heterótrofa e os diferentes grupos teñen unha gran variedade de estruturas complexas que lles serven para procesar os alimentos que inxiren (tubo dixestivo, fígado, páncreas) e eliminar os residuos producidos (por exemplo, grazas aos riles).

Son animais moi diversos tamén en relación ás súas estruturas respiratorias (pulmóns, branquias, pel).

O seu sistema circulatorio é pechado. O sangue permanece en todo momento dentro dos vasos sanguíneos e teñen un ou varios corazóns.

Relación:

Os vertebrados son animais cun sistema nervioso moi evolucionado e complexo.

Teñen diversas estruturas como o encéfalo (protexido polo cranio), a medula espiñal (protexida pola columna vertebral) e os órganos dos sentidos.

Tamén teñen unha extensa rede neural que percorre o corpo (os nervios).

Reprodución:

A reprodución dos vertebrados é de tipo sexual, e a fecundación (unión do gameto masculino e feminino) pode ter lugar no interior da femia (fecundación interna) ou  no exterior do seu corpo (fecundación externa). Os peixes, por exemplo, teñen fecundación externa.

Despois da fecundación, o embrión pode desenvolverse nun ovo (animais ovíparos), no corpo materno (animais vivíparos) ou en ambos (animais ovovivíparos).

Peixes

Os peixes son animais acuáticos e habitan en medios de auga doce, salgada e tamén salobre.

O seu corpo, en xeral, é alongado, está cuberto de escamas e teñen aletas para desprazarse.

Unha estrutura chamada vexiga natatoria actúa a modo de flotador e permítelles estabilizarse cando se desprazan a distintas profundidades.

Teñen branquias para respirar, cunha estrutura protectora ósea chamada opérculo.

Peixes cartilaxinosos.

Exemplo: as quenllas.

Peixes óseos.

Exemplo: as sardiñas.

Anfibios

Os anfibios foron os primeiros animais que colonizaron o medio terrestre.

Poden vivir no medio acuático e no medio terrestre en diferentes fases do seu ciclo vital.

Teñen un corpo cuberto por unha pel moi fina e húmida (ou mesmo non teñen pel), a maioría teñen catro extremidades (son tetrápodos) con membranas entre os dedos e nalgúns casos teñen cola.

En diferentes etapas do seu ciclo vital teñen diversas estruturas respiratorias: poden respirar pola súa pel, por branquias ou por pulmóns.

No seu desenvolvemento poden pasar por varias fases moi diferentes (larva, adulto) e as transformacións e cambios (anatómicos e fisiolóxicos) que lles permiten pasar dunhas fases a outras coñécense como metamorfose, como pasa por exemplo nas ras.

Os anfibios poden clasificarse nun dos seguintes grupos:

Anfibios anuros (sen cola).

Exemplo: as ras.

Anfibios urodelos (con cola).

Exemplo: as píntegas.

Réptiles

A maioría dos réptiles viven en medios terrestres pero hai excepcións, como por exemplo as tartarugas que habitan no medio acuático.

Teñen a pel do seu corpo cuberta de escamas e hai réptiles con catro patas e outros que non as teñen.

Algúns animais deste grupo perden a pel para poder medrar mediante un proceso chamado muda.

Unha estrutura corporal dos réptiles moi importante para a súa supervivencia é a lingua xa que funciona como un órgano con función olfactiva.

A súa respiración é mediante pulmóns.

Os réptiles poden clasificarse nos seguintes grupos:

Crocodilianos

Exemplo: os crocodilos.

Quelonios

Exemplo: as tartarugas.

Saurios

Exemplo: os lagartos.

Ofidios

Exemplo: as serpes.

Aves

A maioría das aves teñen ás que lles permiten voar pero hai excepcións, como por exemplo os pingüíns.

O seu corpo está cuberto de plumas e, para facilitar o voo, teñen as seguintes adaptacións:

- o seu corpo ten forma aerodinámica.

- os ósos son ocos e pesan pouco.

- teñen uns sacos aéreos conectados aos pulmóns cunha reserva de aire.

A boca das aves está modificada para formar o peteiro.

Os peteiros das aves son moi diversos (na súa forma e tamaño) en función da gran variedade de tipos de alimentación que teñen este tipo de animais.

As aves poden clasificarse nun dos seguintes grupos:

Corredoras

Exemplo: as avestruces.

Galináceas

Exemplo: as perdices.

Zancudas

Exemplo: as cegoñas.

Anátidas

Exemplo: as ocas.

Rapaces

Exemplo: as aguias.

Paxaros

Exemplo: as andoriñas.

Mamíferos

Os mamíferos son un grupo de animais vertebrados moi diversos e chámanse así debido a que as femias teñen unhas estruturas chamadas glándulas mamarias coas que alimentan ás súas crías, que dispoñen de beizos para succionar o leite materno.

Son quen de colonizar diversos tipos de medios terrestres e tamén hai especies que viven en medios acuáticos.

O seu corpo está cuberto de pelo e as súas extremidades están adaptadas ao seu modo de desprazamento (ás, patas, aletas).

Teñen respiración mediante pulmóns.

As súas estruturas dixestivas son moi variadas porque tamén o son diversas as modalidades de alimentación (carnívoros, herbívoros, omnívoros).

Teñen os sistemas nerviosos mais complexos e evolucionados do Reino Animal.

Os mamíferos poden clasificarse nun dos seguintes grupos:

Monotremas

Exemplo: o ornitorrinco (aleita ás súas crías pero é ovíparo).

Marsupiais

Exemplo: o canguro (a nai ten unha bolsa chamada marsupio na que as crías completan o seu desenvolvemento).

Placentarios

Exemplo: os tigres e os primates (durante a xestación, a femia desenvolve unha estrutura chamada placenta que lle serve para alimentar ao embrión).