Características xerais

Os animais invertebrados, ademais de ser o grupo mais abundante do Reino Animal, poden vivir en todos os medios naturais do planeta. Hai animais invertebrados en medios terrestres, acuáticos e mesmo en medios con condicións extremas.

Para adaptarse aos diferentes hábitats, este grupo de animais presenta distintas características:

• Non teñen esqueleto interno (esta característica é a que da nome de invertebrados ao grupo).
• Teñen diferentes tipos de simetría e mesmo algúns deles, por exemplo as esponxas, non a teñen. A simetría corporal é unha característica da maioría dos animais. Os animais simétricos teñen unha ou varias liñas que dividen o seu corpo en varias partes iguais. Hai animais invertebrados con simetría bilateral (por exemplo, unha mosca) e tamén hai animais invertebrados con simetría radial (por exemplo, unha estrela de mar).
• Algúns animais invertebrados, por exemplo os artrópodos, teñen un esqueleto externo que os protexen. Outros presentan cascas ou cunchas externas duras de protección.
• A súa temperatura corporal, en xeral, é a mesma ca do medio ambiente no que viven.

Funcións vitais

Nutrición:

A súa nutrición é heterótrofa e os diferentes grupos teñen unha gran variedade de formas de obter o seu alimento. Hai animais que incorporan o alimento por filtración (como por exemplo os mexillóns), carnívoros (como por exemplo as arañas) ou herbívoros (como por exemplo, os caracois).

Relación:

A maioría dos seus órganos sensoriais localízanse na zona da cabeza do animal. Apéndices de diferentes tipos, ollos e antenas son tipos de órganos sensoriais.

Hai diversidade de estruturas nos animais invertebrados con función locomotora (no medio acuático e terrestre). Tamén hai organismos sésiles, que viven fixos sobre diferentes tipos de superficies ou substratos. 

Reprodución:

Hai animais invertebrados con reprodución asexual (a maioría) e tamén hai algúns con reprodución sexual.

Poríferos

Neste grupo animal están incluídas as esponxas.

Son animais acuáticos sen simetría corporal e cunha estrutura corporal moi sinxela.

Filtran auga a través dos poros que recobren o seu corpo, que tamén está formado por unhas estruturas chamadas espículas, que poden ter diferente composición e funcións.

Teñen un tipo de células flaxeladas características chamadas coanocitos.

O movemento dos coanocitos permite que a auga se mova e entre ao interior do animal a través dos poros que recobren o seu corpo e da súa abertura, que se chama ósculo.

Cnidarios

Neste grupo animal están incluídas as medusas, as anemones e os corais.

Son animais acuáticos con simetría corporal radial.

A súa estrutura corporal é simple, con forma de saco e tentáculos. Algúns organismos cnidarios utilizan substancias paralizantes contidas nos seus tentáculos para atrapar as presas que lles serven de alimento.

Este tipo de animais teñen ciclos de vida nos que alternan unha fase móbil (a medusa) cunha fase na que permanecen fixos ao substrato (o pólipo).

Vermes

Este grupo de invertebrados inclúe varios grupos de animais con simetría bilateral e un corpo brando e alongado.

Teñen unha cabeza con órganos nerviosos.

Non presentan ningún tipo de esqueleto (nin externo nin interno).

Habitan medios acuáticos ou terrestres con moita humidade.

Algúns son de vida libre (por exemplo, a miñoca de terra) e tamén os hai que son parasitos de outros organismos (por exemplo, a tenia que vive no intestino dos seres humanos ou as lombrigas dos cans).

Moluscos

Os moluscos son animais invertebrados, acuáticos ou terrestres, que teñen o corpo brando. O seu corpo, nalgúns casos, dispón de estruturas protectoras duras como por exemplo as cunchas dos caracois.

A maioría dos moluscos poden clasificarse nun dos seguintes grupos:

• Gasterópodos. Exemplo: os caracois.
• Bivalvos. Exemplo: os mexillóns e as ameixas.
• Cefalópodos. Exemplo: as luras e o polbo.

Artrópodos

Os artrópodos forman o grupo de animais mais numeroso e diverso do planeta.

Hai case un millón e medio de especies de artrópodos, e aproximadamente un millón deles son insectos.

Son animais que poden vivir en ambientes moi diversos (acuáticos e terrestres).

O seu corpo está segmentado (dividido en tres segmentos: cabeza, tórax e abdome), teñen patas (apéndices) articuladas e un esqueleto externo duro (chamado exoesqueleto).

A maioría dos artrópodos poden clasificarse nun dos seguintes grupos:

• Insectos. Exemplo: os mosquitos e as avespas.
• Arácnidos. Exemplo: as arañas.
• Crustáceos. Exemplo: os cangrexos.
• Miriápodos. Exemplo: os cempés.

Equinodermos

Son animais acuáticos con simetría radial, como por exemplo os ourizos e as estrelas de mar.

Teñen un esqueleto interno duro (chamado endoesqueleto).

Desprázanse grazas a un conxunto de estruturas anatómicas exclusivas deste grupo animal, que se denomina sistema ambulacral.