Características xerais

Os seres vivos incluidos dentro do Reino Animal son pluricelulares, teñen tecidos e están formados por células eucariotas.

As súas células son eucariotas porque o seu material xenético non está disperso polo citoplasma da célula senón que está rodeado por unha membrana e forma o núcleo celular.

Son pluricelulares porque cada un deles ten mais dunha célula.

Teñen tecidos porque as súas células agrúpanse e especialízanse en diferentes funcións.

As células que levan a cabo as mesmas funcións dentro dun organismo son moi semellantes e forman tecidos.

Funcións vitais:

Os animais, como todos os seres vivos, levan a cabo as tres funcións vitais: nutrición, relación e reprodución.

Nos animais, a nutrición é de tipo heterótrofo. Con este tipo de nutrición os organismos incorporan os nutrientes que necesitan a partir da materia que lles proporcionan outros seres vivos.

A función de relación permite que os animais reciban información do medio que os rodea e sexan capaces de elaborar e executar respostas fronte a diferentes tipos de estímulos.

Grazas á función de reprodución, os animais poden xerar novos individuos o que garante a conservación da súa especie.

A gran diversidade de organismos que forman o Reino Animal reflíctese na variedade de tipos de nutrición, relación e reprodución dos diferentes grupos de animais que forman a Biosfera.

Por exemplo, no caso da reprodución, moitos animais reprodúcense sexualmente pero tamén hai grupos de animais que se reproducen de modo asexual.

Función ecolóxica:

Nos ecosistemas, os animais forman parte do grupo dos consumidores.

Cando morren, os seus restos son descompostos por bacterias e fungos que reciclan a súa materia e a devolven ao medio natural para que sexa aproveitada en forma de nutrientes polos organismos produtores mediante a fotosíntese.

A Zooloxía é a ciencia que estuda os animais.

Principais grupos

A gran biodiversidade do Reino Animal tradúcese en que hai moitos tipos diferentes de animais que están adaptados aos medios naturais que habitan.

Esta diferente adaptación dá lugar a diferenzas morfolóxicas, fisiolóxicas e tamén ecolóxicas.

A primeira diferenza que permite dividir os animais en invertebrados e vertebrados está relacionada co seu sistema esquelético.

O sistema esquelético dos animais está formado por ósos e outras estruturas que sosteñen o seu corpo, permiten os movementos e protexen as súas partes brandas.

Os animais invertebrados non teñen columna vertebral nin cranio. Non teñen esqueleto interno.

Os animais vertebrados teñen esqueleto interno formado por columna vertebral e cranio.

Animais invertebrados:

Os animais invertebrados son mais numerosos e diversos cos vertebrados. Na actualidade calcúlase que aproximadamente o 95% de todos os animais que habitan o noso planeta son invertebrados.

Os principais grupos de animais invertebrados son os seguintes:

• Poríferos
• Cnidarios
• Platelmintos, nematodos e anélidos (vermes).
• Moluscos
• Artrópodos
• Equinodermos

Animais vertebrados:

Os principais grupos de animais vertebrados son os seguintes:

• Peixes
• Anfibios
• Réptiles
• Aves
• Mamíferos

Dentro de cada un dos grupos de animais invertebrados e vertebrados hai tamén unha gran diversidade.

Por exemplo, no caso dos artrópodos hai varios grupos diferentes e un deles é o dos insectos. Dentro dos insectos hai mais de trinta subtipos diferentes.

Os insectos son o grupo de animais mais numeroso do planeta. En total, hai catalogadas até o momento mais de un millón de especies diferentes deste tipo de animais.

A continuación imos ver as características xerais, os principais grupos e o modo en que levan a cabo as tres funcións vitais os animais invertebrados e vertebrados das dúas listaxes anteriores.