3.3. O baloncesto

Glosario

Ataque

Definición:: Fase do xogo na cal un equipo ten a posesión do balón.
Exemplo:: Cando atacades, separádesvos para recibir a pelota.

Balón

Definición:: Pelota que pode ser de varios tamaños, inchada de aire, que se utiliza en varios xogos ou deportes.
Exemplo:: Ese xogador manexa moi ben o balón.

Botar

Definición:: Acción de enviar a pelota contra o chan para que rebote.
Exemplo:: O xogador realiza a acción de botar para avanzar coa pelota.

Campo

Definición:: Terreo delimitado para a práctica deportiva. Poden variar as dimensións en función das categorías.
Exemplo:: Campo de xogo.

Canastra

Definición:: Aro fixado a un taboleiro, do que pende unha rede aberta e por onde os xogadores e xogadoras intentan introducir o balón para anotar puntos.
Exemplo:: Recibiu a pelota e lanzou a canastra.

Defensa

Definición:: Fase do xogo na cal un equipo non ten a posesión do balón.
Exemplo:: Cando defendede procurades arrebatarlle o balón ao equipo contrario.

Desmarque

Pictograma moverse polo espazo dun punto a outro

Definición:: Acción que consiste en afastarse da marca dun ou dunha rival, ocupando un espazo libre.
Exemplo:: Fixo un desmarque e despois recibiu o balón.

Marcaxe

Definición:: Acción que consiste en controlar e dificultar os movementos dun xogador ou xogadora rival co obxectivo de non darlle vantaxe.
Exemplo:: Fixo unha dura marcaxe, pois non deixou que o atacante recibise a pelota.

Norma

Definición:: Regra ou conxunto de regras necesarias para a práctica do deporte.
Exemplo:: Coñecedes as normas antes de practicar o deporte.

Pase

Definición:: Acción técnica que consiste en intercambiar o balón entre os integrantes dun mesmo equipo a través de lanzamentos e recepcións.
Exemplo:: Non podía avanzar e decidiu pasar a pelota.

Táctica

Definición:: Acción de planificar a táctica de ataque e de defensa.
Exemplo:: A adestradora explicoulle ás xogadoras a táctica defensiva.

Técnica

Definición:: Accións ou habilidades específicas empregadas nos deportes para atacar ou defender.
Exemplo:: No baloncesto existen diferentes habilidades técnicas como son: o bote, o pase e o tiro a canastra.

O baloncesto

Nos deportes hai dous compoñentes moi importantes que habitualmente se confunden: a técnica e a táctica.

Queres saber máis sobre estes conceptos? Fai clic en cada un deles e aprende o seu significado para levalos á práctica nas nosas sesións.

Lectura facilitada

Nos deportes confúndese a técnica e a táctica.

Fai clic no botón de técnica e táctica.

Aprende sobre estes conceptos.

Audio

Aspectos técnicos

A técnica pódese definir como a execución motriz dun xesto deportivo. Que quere dicir isto?

Son aqueles movementos ou partes de movemento que permiten realizar accións de ataque e defensa en base a unha determinada intención de xogo, e cunha calidade de execución máis ou menos boa. Hai unha gran variedade de xestos dependendo do deporte que practiquedes. Agora ides coñecer os aspectos técnicos do baloncesto.

Lectura facilitada

A técnica é a execución motriz dun xesto deportivo.

Son aqueles movementos que permiten realizar accións de ataque e defensa.

Hai gran variedade de xestos dependendo do deporte que practiquedes.

Agora vamos coñecer os aspectos técnicos do baloncesto.

Audio

O bote

O bote é unha acción técnica que consiste en empurrar o balón coa man ao chan para que retorne á man.

Audio

O pase

O pase é unha acción técnica que consiste en intercambiar o balón entre os integrantes dun mesmo equipo a través de lanzamentos e recepcións.

No deporte do baloncesto existen diferentes tipos de pases que podedes ver a continuación:

Pase de peito

Pase realizado lanzando o balón dende a altura do peito e chegando ao receptor á mesma altura aproximadamente nunha traxectoria case recta.

Pase picado

Xogadoras realizando un pase picado en baloncesto

Pase realizado empregando as dúas mans coa intención de que rebote antes de ser recibido polo receptor elevándose á altura da cintura.

Pase de béisbol

Xogadora realizando un pase de béisbol en baloncesto

Pase longo realizado cunha man.

Pase por detrás das costas

Neno realizando un pase por detrás das costas

Pase realizado por detrás das costas coa man contraria ao lugar no que se atopa o futuro receptor ou receptora.

Pase por enriba da cabeza

Xogadoras realizando un pase por enriba da cabeza

Pase realizado lanzando o balón dende enriba da cabeza fortemente e coas dúas mans.

Pase de man a man

Pase realizado coas dúas mans cando un compañeiro ou compañeira está preto. Caracterízase por non haber traxectoria no desprazamento.

Tiro a canastra

Acción pola que se intenta introducir o balón dentro do aro co obxectivo de sumar puntos.

Existen diferentes tipos de tiros a canastra en función da puntuación que se obtén.

Podedes ver exemplos a continuación:

En estático

Lanzamento que se realiza en estático dende calquera posición na pista. Non existe salto nin movemento.

Exemplo

Tiro libre: lanzamento en estático dende a liña de tiro libre despois dunha falta. A súa puntuación é dun punto.

En movemento

Lanzamentos que se realizan en movemento. Poden ser despois de botar, en carreira tras recibir un pase, ou saltando.

Neno realizando un tiro en supensión a canastra

Exemplo

En suspensión: lanzamento a canastra tras elevarse no aire.

Xogadora realizando unha entrada a canastra

Exemplo

Entrada a canastra/bandexa: lanzamento en carreira cunha soa man despois de dar máximo dous pasos e deixar de botar o balón.

Para saber máis...

No baloncesto tamén existen outros tipos de lanzamentos en movemento que requiren de maior técnica como son:

O gancho: Lanzamento cunha única man, creando un arco por enriba da cabeza, a curta distancia.

O mate: Tipo de tiro que consiste en introducir o balón na canastra, de arriba a abaixo, cunha ou dúas mans despois dun gran salto.

Aspectos tácticos

Todo deporte ten a súa táctica e, nun deporte colectivo, pódese definir a táctica como a elección correcta do xesto axeitado para unha situación de xogo concreta.

As situacións de xogo que nos podemos atopar son en ataque ou en defensa.

Tedes que ter en conta que a técnica e a táctica van da man. Que quere dicir isto? Que un xogador ou xogadora, para decidir o tipo de pase que quere executar, ten que tomar unha decisión táctica.

Lectura facilitada

Todo deporte ten a súa táctica.

Nun deporte colectivo, a táctica é a elección correcta do xesto axeitado para unha situación de xogo concreta.

As situacións de xogo que nos podemos atopar son en ataque ou en defensa.

A técnica e a táctica van da man. Un xogador ou xogadora, para decidir o tipo de pase que quere executar, ten que tomar unha decisión táctica.

Audio

Que fago en ataque

Se teño o balón:

Desprazamento botando o balón

Desprazaraste botando o balón cara a canastra rival cando non teñas diante rivais a pouca distancia.

Os posibles obxectivos do desprazamento con bote será:

- Progresar buscando unha mellor opción de lanzamento a canastra.

- Progresar buscando unha mellor opción de pase.

Pasar o balón

Pasarás o balón cando diante teñas un/ha rival cerca que non che permite avanzar ou cando percibas que un compañeiro ou compañeira está en disposición de recibir o balón.

Lanzar a canastra

Poderás lanzar a canastra cando te atopes cerca dela e non teñas rivais diante que che impidan facer o lanzamento.

Se son compañeiro ou compañeira do xogador/a con balón, é dicir, se non teño o balón:

Desmarque

Acción que consiste en separarse dos/das defensores/as e ocupar un espazo libre para recibir o balón o máis libre de rivais posible.

Que fago en defensa

Marcaxe

Acción táctica que consiste en asignarse un ou unha rival atacante, controlar e dificultar os seus movementos co obxectivo de non darlle vantaxe.

Roubo

Acción que consiste en facerse coa posesión do balón cando o ten o equipo contrario.

Experimentando co balón

Poñede en práctica todos os coñecementos vistos sobre o baloncesto nas sesións motrices de Educación Física.

Realizaredes diferentes xogos e tarefas co voso mestre ou mestra.

Pensade que para crear o voso evento deberedes ter un certo dominio práctico dos xestos técnicos e tácticos.

A xogar!

Licenciado baixo a Licenza Creative Commons Atribución Non-comercial Compartir igual 4.0