Antonio Vivaldi (1678-1741) foi coñecido como il prete rosso pola cor dos seus cabelos e pola súa vocación sacerdotal. Foi director do coro e da orquestra dun orfanato feminino en Venecia, e, como excelente intérprete do violín, soubo aproveitar e desenvolver as capacidades técnicas e expresivas dos instrumentos da familia de corda fretada, para a que compuxo centos de obras.
Dentro do seu extenso catálogo compositivo cómpre destacar as composicións instrumentais chamadas "concerto". Estas obras constan de tres movementos ou partes, contrastantes en velocidade (rápido- lento- rápido). Dentro deste grupo, nos "concertos a solo", sobresae un instrumento protagonista (o solista) que toca as melodías máis difíciles e brillantes, acompañado por instrumentos de corda fretada e clavicémbalo.
Os catro concertos "As catro estacións" , compostos no ano 1721, son os máis coñecidos deste compositor, e cóntanse entre as páxinas máis populares da historia da música. Deles, o máis célebre é o primeiro: "A Primavera". Escoita o primeiro movemento, Allegro, e comproba cómo Vivaldi, mediante a música, logra describir escenas primaverais como: murmurio das fontes, cantos dos paxaros ou tormentas: Youtube: Vivaldi: A primavera - Allegro
Actividade1 : Debuxa ou escribe un texto (narrativo ou poético) que represente as escenas primaverais que te suxira a música.
No cuarto concerto, "O inverno", a música semella os efectos do vento xélido, combinado con notas repetidas que imitan o tremor que se sinte ante o frío. Pero no segundo movemento deste concerto, largo, a paz e a quietude que transmite a melodía do violín reflicten outras sensacións; dentro da casa, ao carón da lareira, a chuvia soa dende fóra delicadamente, mentres a ledicia e a serenidade florecen dentro do fogar. Youtube: Vivaldi. O inverno, Largo.
Actividade2 : Debuxa ou escribe un texto (narrativo ou poético) que represente a imaxe que te suxire este movemento de "O inverno".