2.2.2 Enerxía potencial gravitacional
Xa sabemos que o planeta Terra atrae todos os corpos cara ao seu centro (cara a abaixo, dicimos habitualmente). Para cambiar a posición dun corpo desde o chan ata outro punto máis alto, precísase enerxía. Pois ben, cando o corpo finalmente está nesa posición elevada ten enerxía potencial gravitacional, aínda que estea en repouso. Así, a auga dun depósito que está a 3 m de altura ten enerxía potencial; se a deixamos caer enriba das palas dunha turbina pode producir electricidade: a enerxía potencial gravitacional transfórmase en enerxía eléctrica, daquela a auga tiña enerxía!
A enerxía potencial gravitacional é, en xeral, a enerxía que ten un corpo debida á súa posición nun campo gravitacional (terrestre ou calquera outro). Tamén a partir do traballo demóstrase que a fórmula para calcular a enerxía potencial gravitacional é
Deducimos que esta enerxía é directamente proporcional á masa do corpo e á altura en que estea situado.
Actividade resolta
Calcule a enerxía potencial dun bloque de pedra de 500 kg que está enriba dunha trabe a 4 m de altura.
-
Solución
Ep = m.g.h = 500 kg. 9,8 N/kg. 4 m = 19 600 J
Actividades propostas
S11 Un operario levanta un balde con 10 kg de pintura ata unha altura de 12 m. Canta enerxía potencial ten a pintura cando está arriba? De onde saíu esa enerxía?
S12. Un corpo A ten o dobre de masa e está ao dobre de altura que outro corpo B. Cantas veces máis enerxía potencial ten o corpo A que o B?
S13. Dous corpos coa mesma masa están á mesma altura, un na Terra e outro en Marte. Teñen a mesma enerxía potencial os dous? Explíqueo.
- Licencia
por ireth12 en Flirk
S14. Unha nave espacial móvese moi lonxe da Terra. Ten enerxía cinética? Ten enerxía potencial gravitacional?
S15. Calcule canto aumenta a enerxía potencial dunha persoa de 65 kg cando sobe desde o terceiro piso dun edificio ata o sétimo. A altura entre cada dous pisos é 2,75m
Licenciado baixo a Licenza Creative Commons Recoñecemento Non-comercial Compartir igual 3.0