2.2.4 Clasificación dos seres vivos: os cinco reinos

A grande variedade de seres vivos fai necesario identificalos, ordenalos e agrupalos. Estes tres procesos permiten establecer unha clasificación, cuxos criterios variaron na historia. Hoxe emprégase un sistema de clasificación que agrupa aos organismos en cinco reinos.

Os cinco reinos

Moneras: que abrangue os organismos procariotas. Protoctistas: formado por algas e protozoos. Fungos: constituído por fungos e lévedos. Plantas. Animais.

  Para incluír un organismo nun reino determinado téñense en conta os criterios seguintes:

Reinos	Tipo de nutrición	Organización celular	Tipo de célula	Presenza de tecidos
Moneras	Autótrofa / heterótrofa	Unicelular	Procariota	Sen tecidos
Protoctistas	Autótrofa / heterótrofa	Unicelular / pluricelular	Eucariota	Sen tecidos
Fungos	Heterótrofa	Pluricelular	Eucariota	Sen tecidos
Plantas	Autótrofa	Pluricelular	Eucariota	Con tecidos
Animais	Heterótrofa	Pluricelular	Eucariota	Con tecidos

• Reino Moneras: está constituído polas bacterias. Algúns destes organismos son patóxenos, é dicir, causan doenzas, pero outros, a maioría, son beneficiosos.

As bacterias son moi pequenas, teñen un tamaño inferior a 10 microns (1 micron é a milésima parte dun milímetro). Nun milímetro, xa que logo, caben aliñadas entre cen e mil bacterias.

• Reino Protoctistas: inclúe dous grupos de organismos perfectamente diferenciados, os protozoos e as algas.

• Protozoos: son organismos unicelulares, heterótrofos. Algúns viven libres e outros son parasitos.

Tripanosomas	Plasmodium	Pamanecio

• Algas: son organismos acuáticos, unicelulares ou pluricelulares. Teñen pigmentos que lles permiten realizar a fotosíntese. Non se consideran plantas porque as algas pluricelulares non teñen tecidos.

Caulerpa	Volvox	Alga vermella

• Reino Fungos: está constituído por organismos moi variados que teñen en común que son heterótrofos. Os fungos cumpren un papel moi importante na natureza, xa que contribúen a degradar a materia orgánica en descomposición: son organismos saprofitos.

Tamén hai fungos parasitos que viven ás expensas dun organismo vivo (planta ou animal) causándolle dano. Os antibióticos son substancias que se descubriron ao se produciren por algúns fungos.

Amanita phalloides	Peziza	Saccharomyces