1.1 Descrición da unidade didáctica

Esta unidade denomínase Os medios de comunicación. Dedicaremos a esta unidade o equivalente a un total de 16 horas lectivas. Pode distribuílas como mellor lle pareza, pero o recomendable é que diariamente traballe con ela entre unha e dúas horas.

Ademais, debe ter en conta as seguintes puntualizacións:

  • A unidade contén textos e exercicios en galego e castelán, separados en dúas partes ben diferenciadas. Ambas as linguas, xunto coa estranxeira, intégranse no ámbito da comunicación.

  • A unidade consta de dous tipos de textos ou contidos: uns que levan a etiqueta de "aspectos teóricos", que son os que debe comprender e memorizar, e outros que carecen desa etiqueta, que son os que debe ler, comprender e comentar.

  • Os contidos e exercicios van clasificados en bloques ou partes, relacionados con distintos aspectos do estudo da lingua: comunicación oral, comunicación escrita, coñecemento da lingua, lingua e sociedade e educación literaria.

Logo de rematada a unidade deberá ser quen de:

  • Valorar a importancia da lingua oral como forma de comunicación universal.

  • Comprender textos orais procedentes dos medios de comunicación audiovisual.

  • Comprender e valorar de xeito crítico a comunicación televisiva e radiofónica.

  • Recoñecer e comprender textos impresos e dixitais dos medios de comunicación.

  • Ter unha actitude reflexiva e crítica ante as mensaxes procedentes dos medios de comunicación que supoñan calquera tipo de discriminación.

  • Compor textos coas características formais máis usadas nos xéneros propios dos medios de comunicación.

  • Coñecer, dentro do marco peninsular, as causas que contribúen á formación, transformación, substitución e minorización das linguas.

  • Comprender e valorar a situación sociolingüística galega a través da abordaxe dos fenómenos de contacto de linguas.

  • Valorar textos literarios aparecidos nos medios de comunicación.

Obra colocada bajo licencia Creative Commons Attribution Non-commercial Share Alike 3.0 License