Muiñeira
O baile máis representativo de Galicia é a muiñeira, xénero que algúns compositores da música culta chamaron gallegada e que xa aparece mencionado na poesía lírica de finais do século XV e comezos do XVI. O seu nome, consolidado no século XIX, fai referencia ás muiñadas, reunións festivas que se celebraban arredor dos muíños.
A muiñeira escríbese en compás de 6/8, é un baile caracterizado polo seu ritmo binario, pero ten subdivisión ternaria.
Trátase dun baile solto, normalmente executado en parella, con saltos e xiros moi marcados. Pode organizarse en dúas filas —tradicionalmente unha de mulleres e outra de homes— ou en roda, e os pasos van cambiando segundo avanza a parte instrumental da música
A guía vai marcar o paso que logo repiten o resto de bailaríns.
Lectura facilitada
A muiñeira é o baile máis representativo de Galicia.
É unha danza moi antiga.
O seu nome vén das muiñadas, que eran festas nos muíños.
A música está en compás de 6/8.
Ten un ritmo rápido e marcado.
É un baile solto.
Báilase normalmente en parella.
Ten saltos e xiros.
Pode facerse en filas ou en roda.
Hai unha persoa que marca o paso, chámase guía.
Os demais repiten.
Audio
Posición corporal
A posición corporal xeral do corpo debe ser sempre erguida.
- O peito está alto, os ombros activos pero relaxados (non os subas!) e mantén a mirada alta. A posición, ao bailar baile tradicional, sempre debe de ser unha posición de orgullo.
- Os brazos están levantados, as mans á altura dos ollos, activas pero non ríxidas.
- O corpo acompaña os puntos con lixeiros xiros e balanceos, mantendo a verticalidade mentres os pés realizan pasos rápidos (tacón-punta-tacón).
- Tradicionalmente, o varón realizaba movementos máis bruscos ou vigorosos mentres a muller bailaba dun xeito máis discreto e recollido, aínda que ambos os dous manteñen a postura erguida.
Recorda: peito e mirada arriba, brazos elevados e corpo firme. É moi cansado pero... divertido!
Partes
Dividirémola en tres partes: Descanso, punto e volta.
- Descanso: tamén chamado paseo, é a parte da coreografía máis sinxela, os bailadores aproveitaredes para tomar aire.
- Punto: é a parte máis complexa, onde ides sumar pasos base.
- Volta: avanzamos no espazo, faredes normalmente o mesmo paso.
Observa este vídeo, onde se fai unha explicación máis detallada destas partes.
Ides observar un exemplo sinxelo desta mesma escola na que se ven moi ben as partes desta danza, así como se identifica con claridade quen é o guía e como o seguen as compañeiras e os compañeiros.
Lectura facilitada
Posición corporal
O corpo debe estar erguido.
O peito alto
A mirada arriba
Os brazos levantados
O corpo firme pero relaxado
Os pés fan pasos rápidos.
Partes da muiñeira
A muiñeira pode ter tres partes:
Descanso
É a parte máis doada, serve para respirar e situarse.
Punto
É a parte máis difícil, facemos o paso principal.
Volta
Movémonos polo espazo repetindo sempre o mesmo paso.
