Xa coñecedes o voso reto. Para desenvolvelo necesitaredes os contidos que ides aprender nesta terceira fase. A continuación tedes pautas que vos serán útiles no deseño dos pósters para a olimpíada de Xeografía.

Que debe incluír o voso póster?

Cada póster deberá ter:

• Un título co nome do lugar escollido.
• Un subtítulo co tipo de clima.
• O climograma do lugar que cada grupo elaborou seguindo as instrucións que figuran no REA.
• Unha foto dun río representativo desa área. No pé de foto deberá figurar o nome do río, a lonxitude, a vertente á que pertence e, de ser posible, o caudal.
• Fotos de dúas especies vexetais típicas do espazo que se está traballando. Sería bo que tamén houbese unha imaxe das follas ou dos froitos. No pé de foto deberá figurar o nome vulgar e mais o nome científico de cada unha delas.
• Dúas fotografías de dúas paisaxes representativas deste tipo de clima.

Organizamos o grupo:

Para conseguir resolver o reto con solvencia temos que facer un esforzo de organización grupal, tendo en conta que só podemos ter éxito se todos achegamos o noso gran de area. Temos que aceptar a opinión do grupo, sen ir por libre, cumprindo os prazos, axudándonos (non todos temos a mesma facilidade para este tipo de tarefas) e contribuíndo a crear bo ambiente.

• Eliximos un coordinador ou unha coordinadora do equipo, que moderará os posibles debates e será o interlocutor co profesor ou coa profesora.
• Escollemos o clima.
• Repartimos os primeiros quefaceres.

Seredes quen de conseguilo? Seguro que si!