Glosario
Aurora boreal
-
Definición:
-
Forma de luminescencia que se observa no ceo nocturno, xeralmente nas zonas polares.
-
Exemplo:
-
De noite, no norte de Europa é doado ver unha aurora boreal.
Sol, auga e plantas
3.2. Aire, dáme aire!
A atmosfera
Denomínase atmosfera a capa gasosa que envolve a Terra. Está formada por diferentes gases, entre os que destacan o nitróxeno (78%) e o osíxeno (20,95 %). O 1,05 % restante repárteno o argon, o neon, o helio, o hidróxeno...
A atmosfera é básica para a existencia de vida na Terra, pois funciona como un filtro de diferentes radiacións solares, axuda a controlar a temperatura no planeta e, ademais, evita a colisión de moitos meteoritos contra a superficie terrestre.
A atmosfera non é homoxénea. Nela podemos distinguir cinco capas diferentes, descobre as súas características.
Troposfera
A troposfera alcanza os 12 km de altura. Nesta capa prodúcense os distintos fenómenos atmosféricos que definen cada clima: precipitacións, nubes... É a capa que contén a inmensa maioría dos gases e do vapor de auga. A temperatura descende coa altitude.
Estratosfera
A estratosfera vai dende os 12 ata os 50 km de altura. Contén a capa de ozono, que é un gas que filtra parte das radiacións ultravioletas do sol, xa que poden ser prexudiciais para a nosa saúde. A temperatura ascende coa altitude.
Mesosfera
A mesosfera esténdese dende os 50 ata os 80 km. Esta capa, na que se rexistran temperaturas moi baixas, funciona coma un auténtico escudo contra os meteoritos.
Termosfera
A termosfera sitúase entre os 80 e os 500 km. A temperatura aumenta coa altitude e pode sobrepasar os 1000°. Nesta capa teñen lugar as auroras boreais.
Exosfera
A exosfera desenvólvese partir dos 500 km e chega ata os 10.000 km. Dá paso ao espazo interplanetario.
Lectura facilitada
A atmosfera é unha capa gasosa que envolve a Terra.
A atmosfera está formada por diferentes gases.
O gas máis importante é o nitróxeno.
Sen atmosfera non podería haber vida na Terra.
A atmosfera divídese en 5 capas diferentes.
A capa que máis nos inflúe é a troposfera.
Lista desordenada
Empregando as frechas, pon en orde as capas da atmosfera. Comeza pola máis próxima á superficie terrestre e remata coa máis afastada:
- TROPOSFERA
- ESTRATOSFERA
- MESOSFERA
- TERMOSFERA
- EXOSFERA
Licenciado baixo a Licenza Creative Commons Atribución Non-comercial Compartir igual 4.0