Como xa sabes, os astronautas dedican a súa vida a estudar o Universo. Hai persoas ás que lles encanta a ciencia ou a tecnoloxía; outras prefiren ser enxeñeiras ou enxeñeiros, ou dedicarse ao mundo das artes. Tamén están aquelas que adoran as matemáticas. Todas estas profesións reciben o nome de STEAM polas súas siglas en inglés. O "S" ven de Science (Ciencia) o "T" de Technology (Tecnoloxía), o "E" de Engeneering (Enxeñaría), o "A" de Arts (Artes) e o "M" de Maths (Matemáticas).

Ao longo da historia algunhas persoas fixéronse famosas polos seus descubrimentos, as súas invencións, avances científicos ou pola súa contribución ao mundo da música ou da pintura, é dicir, das artes. Todas estas persoas dedicaron a súa vida a algunha destas profesións e axudaron a avanzar á humanidade.

Seguro que algunhas delas resúltanche coñecidas, como Neil Armstrong, que foi o primeiro astronauta en pisar a Lúa no ano 1969 ou Copérnico, un astrónomo que propuxo que a Terra e os outros planetas xiraban arredor do Sol. Ata ese momento os científicos crían que a Terra era o centro do Universo.

Neste reto ides investigar algunhas destas persoas. Escolleredes unha e cambiando os roles dentro dos equipos buscaredes a seguinte información:

Piloto: Nome completo, nacionalidade, data de nacemento e morte (se faleceu). Tamén buscará unha foto.

Comandante: Estudos, profesión e razón pola que é famosa ou famoso.

Especialista: Completará a ficha coa información e pegará a foto.

Ao rematar podedes colorear a terceira e última misión das vosas tarxetas identificativas de astronauta.

Aquí tes un exemplo do tipo de información que debes buscar, preme na imaxe e abrirase a ficha en pdf.

• Ciencia: Samantha Cristoforetti, Galileo Galilei, Marie Curie
• Tecnoloxía: Steve Jobs, Mark Zuckerberg, Bill Gates
• Enxeñaría: Margaret Hamilton, Jeff Bezos
• Artes: Léon Theremin, Frida Kahlo
• Matemáticas: Pitágoras, Hipatia

Acordádevos de gardar as fichas para expoñelas no Museo Espacial.