Saltar navegación

2.5. Imos ao Museo Espacial

Deixamos pistas

Rosa dos ventos debuxada no chan

O Museo Espacial estará dentro do voso colexio.

Para que o resto do alumnado saiba que algo importante está a piques de pasar, ides deixarlles unha pista.

Sairedes ao patio cun compás para identificar a dirección na que se atopan os puntos cardinais.

Despois pintaredes no chan ben visible e grande, unha rosa dos ventos con oito puntas: N, S, L, O e as intermedias NL (nordeste) , SL (sueste), NO (noroeste) e SO (suroeste).

O día da exposición, engadiredes unha frecha que marque a dirección na que se atopa o Museo Espacial, e así poder guiar ao alumnado ata alí.

Lectura facilitada

O Museo estará dentro do voso colexio.

Para que o resto do alumnado saiba del, hai que lles deixar unha pista.

No patio identificade os puntos cardinais.

Pintade no chan, en grande, unha rosa dos ventos indicando:

N, S, L, O e as intermedias NL (nordeste) , SL (sueste), NO (noroeste) e SO (suroeste).

O día da exposición porédeslle unha frecha indicando a dirección que deben seguir para chegar ao Museo Espacial.

Mans á obra!

Para esta parte, seguiredes traballando nos vosos equipos co mesmo rol que na actividade 2.1. e coa información recompilada nela.

Ao rematar, recordade colorear e cubrir as fases da primeira misión na tarxeta de astronauta.

Paso 1

Tres persoas observando planetas

Crearedes un planetario cos planetas feitos nos vosos grupos que colocaredes no Museo Espacial.

Elixiredes o material máis axeitado para facer o voso planeta: unha bola de polistireno ou unha esfera feita con papel maxé.

O importante é que o planeta teña a cor máis parecida á realidade e que o tamaño sexa proporcional ao resto dos planetas.

Se o voso planeta é algún dos que están máis achegados ao Sol, terá que ser máis pequeno que aqueles máis afastados do Sol.


Paso 2

Rapaz facendo unha presentación

Lucho quere meter na súa memoria toda a información que recollestes sobre os planetas, así que lla daremos en formato dixital.

Crearedes unha presentación sobre o voso planeta con:

  • Presentación de diapositivas
  • Gravación de vídeo
  • Gravación de audio con Chatterpix (pode ser a imaxe do voso planeta a que fale)
  • Vídeo con Scratch
  • Ou calquera outra opción que se vos ocorra.

Meteredes a presentación multimedia nunha tableta para que, tanto Lucho, como as persoas que visiten o Museo Espacial teñan a oportunidade de aprender tanto coma vós.

Paso 3

Sala dun museo con cadros e esculturas

Faredes unha exposición con todo o material creado sobre os planetas.

Para crear o planetario, colocaredes os planetas que fixestes na orde correspondente, e ao seu lado a información recollida sobre as súas características.

Tamén poredes as tabletas preparadas coas vosas presentacións dixitais, listas para reproducirse.

O Museo Espacial vai ser todo un éxito! Repartide ben as tarefas.

Diario de aprendizaxe

Imaxe do diario de aprendizaxe no proxecto cREAgal. Amosa un lapis e un caderno co logotipo do proxecto na tapa

Sensacional! Chegaches ao final da Fase 2. Chegou o momento de reflexionar sobre o traballo feito nesta fase.

Completa e contesta as preguntas no diario de aprendizaxe.

Feito con eXeLearning (Nova xanela)