Xela é unha nena de 10 anos que quere ser astronauta cando sexa grande. Os e as astronautas viaxan en foguetes espaciais fóra da atmosfera terrestre e pasan moito tempo preparándose para as distintas misións. O soño de Xela é visitar Marte, o planeta vermello.

Ata agora os astronautas visitaron a Lúa e a Estación Espacial Internacional (ISS). Este lugar é unha pequena cidade científica que flota no espazo a 400 km por enriba da Terra. É tan grande coma un campo de fútbol e alí os astronautas poden vivir por algún tempo para estudar e coñecer mellor o Universo.

O mellor amigo de Xela é Lucho, un robot que ela mesma programou. A Lucho encántalle todo o que Xela lle conta do Universo e encantaríalle acompañala nas súas aventuras espaciais. Pero aínda lle hai que ensinar moito.

Primeiro faremos unha viaxe polo Sistema Solar e coñeceremos os distintos planetas, así como os asteroides ou cometas. Tamén teremos que aprender a orientarnos e crear mapas. Finalmente, con todo o traballo feito, crearemos no cole un Museo Espacial para que todo o alumnado aprenda ao mesmo tempo que Lucho.

Tedes moito traballo por diante para encher o museo coas vosas creacións, tanto as que faredes a man como en soporte dixital.

Axúdaslle a Xela e a Lucho a completar esta misión?