HERBARIO

QUÉ É UN HERBARIO?

Os herbarios son unha ferramenta fundamental na investigación científica do mundo vexetal. Os máis antigos datan do século XVI. O obxectivo fundamental dos herbarios sempre foi almacenar e compartir material de referencia para a investigación. Ademais, serven como material educativo que permite coñecer e estudar mellor os taxons (fundamentalmente os vexetais pero tamén algas, liques e fungos) propios dun lugar. Grazas ao herbario, temos permanentemente dispoñibles exemplares de especies que na natureza aparecen na súa plenitude só de xeito estacional.

Paul Venter. Herbarium vivum (Dominio público)

TAREFA: O NOSO HERBARIO VIRTUAL

O noso herbario terá exclusivamente fins didácticos polo que será realizado con fotografías. NON RECOLECTAREMOS ningún exemplar para minimizar o impacto ambiental do noso paso. Permitiranos coñecer mellor a diversidade vexetal do camiño a Fisterra, traballar de xeito metódico e reparar nos cambios que se van producindo na vexetación a medida que avanzamos e cambian as condicións ambientais (tanto de xeito natural, fisicoquímicas, como polos usos artificiais da terra).

Toni Castillo Quero. Delf fotografiando (CC BY-SA)

Retroalimentación

REQUISITOS DO HERBARIO

Cada alumno/a deberá asegurarse de que o seu herbario inclúa, como mínimo, os taxons necesarios para cubrir os requisitos mínimos, que garantirán unha avaliación positiva da actividade.

Valorarase positivamente a inclusión de especies adaptadas a distintos ambientes (Bosque, matogueiras, prados, brañas, costa rochosa, dunas…) ou con algunha particularidade especial (plantas con nutrición heterótrofa, endémicas…). Non se aceptarán plantas de xardín.

Exemplares mínimos esixibles:

4 Briófitas (División Briophyta). Cando menos incluirá unha hepática (Clase Marchantiopsida). Non é necesario determinar a especie.
5 Pteridófitos (incluíndo a especie Blechnum spicant)
1 Ximnosperma (División Pinophyta).
10 Anxiospermas (División Magnoliophyta), das cales: 3 Monocotiledóneas (Clase Liliopsida) e 7 Dicotiledóneas (Clase Magnoliopsida). Entre as monocotiledóneas e tamén entre as dicotiledóneas, ten que haber especies de polinización anemófila e zoófila, sinalando esta característica na súa ficha.

Marta Coria. Flores no Camiño (CC BY-SA)

EXEMPLO DE FICHA

Para elaborar o noso herbario, recompilaremos as fichas das especies requeridas. Para que a ficha dun taxon sexa completa deberá incluír:

Fotografía/s que permitan a identificación (detalle das flores, froitos ou outras partes esenciais).
Nome científico (nome común, se é o caso).
Clasificación ou grupo.
Localización aproximada e hábitat.
Breve descrición.
Data de elaboración.
Nome do autor/a da determinación.

Podes seguir o seguinte exemplo para facer as fichas do teu herbario ou deseñar un modelo propio.

RECURSOS PARA A TAREFA

¿Onde podemos atopar información para o noso herbario?

Para localizar o nome científico e o común podes botar man destes recursos:

guía de flora

Para describir as súas características, será de moita utilidade o seguinte manual:

manual de identificación de plantas vasculares

QUE DEBEMOS CONSEGUIR?

Para avaliar esta tarefa, utilizaremos un instrumento de avaliación que se chama rúbrica. Podes consultala antes de comenzar a actividade para coñecer o que se vai avaliar e cales son os niveis que debes acadar en cada apartado que se vai avaliar. Deste xeito será máis doado saber o que debedes conseguir exactamente co voso traballo.

Licenciado baixo a Licenza Creative Commons Recoñecemento Compartir igual 4.0

« Anterior | Seguinte »