2.4 Escenarios familiares actuais

• Tema principal: a diversidade de clases de familias da sociedade actual.

• Parágrafos:

Parágrafo 1: preséntasenos a tese que o autor do texto vai argumentar ao longo do mesmo. Dísenos que a familia é un tema que esperta moito interese, tanto na actualidade como en épocas anteriores.

“Poucos fenómenos sociais suscitan tanto interese e discusión permanente como é o da familia. En diferentes épocas, contextos, e dende múltiples lugares de interlocución, “a cuestión familiar” supón un catalizador de múltiples debates e polémicas, interpelando directamente moitas delas á identidade de toda unha sociedade, de como esta vive, o que nela acontece e dos seus futuribles”.

Parágrafo 2: fálasenos das funcións sociais que as familias poden cumprir nunha sociedade.

“Analistas sociais tenden a referirse á temática aludindo ás funcións sociais que a familia cumpre nunha sociedade: funcións cambiantes ou ameazadas, procesos que a comprometen ou afortalan, subxacendo unha mirada concentrada no diagnóstico (¿está a familia en crise?) e/ou alternativamente na prognose (¿cal é o futuro da familia?).

Estes enfoques deixan pouca marxe para un esforzo comprensivo da experiencia familiar máis inmediata e cotiá: ¿como viven as familias? ¿Como se proxectan os seus membros nelas e a través delas? ¿Por medio de que itinerarios vitais se conforman e en que contextos e escenarios estruturais se constitúen as diferentes retículas familiares?”

Parágrafo 3: fálasenos da dificultade que implícita que supón dar unha definición adecuada da familia.

“Estas preguntas refírense fundamentalmente aos aspectos experienciais e aos sentidos performativos que están detrás do máis manifestmente observable, como son as denominadas “estruturas familiares”. Mais outro tipo de interrogantes que se nos antollan particularmente oportunos para entendermos a realidade familiar aluden aos compoñentes de significado e disputa que circulan en torno ao que son e deben ser as familias. A natureza política da familia queda patente na incapacidade de diferentes sectores da nosa sociedade para consensuar o que a familia significa e o que a define como institución social particular (Gittins, 1985). As paixóns, os medos, as expectativas, os valores e o reservorio ideolóxico que se detectan nas análises legais e doutas non axudan a crear espazos de reflexión crítica sobre os seus compoñentes constitutivos nin tampouco permiten, polo xeral, unha observación despaixonada da realidade empírica familiar [...].”

• Significado das palabras.

Prognose: coñecemento anticipado dun feito que vai suceder.

Retícula: tecido en forma de rede.

Empírico: que se basea na experiencia e na observación.

Resposta libre