Todas as artes nunha
Ides dar un pasiño máis na preparación da vosa obra! E é que o teatro non só é que teña relación con outras disciplinas artísticas, senón que no teatro están todas as outras artes: a música, a pintura etc!
No caso concreto de Os vellos non deben de namorarse, aínda con máis razón. Por un lado, porque na obra tamén se canta e o texto inclúe cancións como “Lela” ou a “Muiñeira de pandeiros”. E, por outro lado, como xa vimos, Castelao non só era escritor, senón que tamén destacaba como debuxante e pintor e disque dixo que esta non era unha obra do Castelao escritor, senón que era sobre todo unha obra do Castelao artista gráfico. E é que el mesmo fixo as máscaras dos personaxes, a escenografía ou a cartelaría.
Pois nestes elementos tedes que ir pensando vós tamén! Haberá que preparar algo de escenografía? Vestiario? Quen canta? Reflexiona no teu diario de aprendizaxe sobre estes aspectos.
Ah! E lembra que desde a fase 1 tes unha listaxe de cotexo para ir asegurándonos de todos os pasos (aquí en formato .pdf e aquí en formato .odt editable).
Lectura facilitada
Imos dar un pasiño máis na preparación da obra de teatro.
O teatro non só ten relación con outras artes.
No teatro están todas as artes xuntas:
a música, a pintura, e moitas máis!
No caso da obra Os vellos non deben de namorarse, isto vese moi claro.
Na obra tamén se canta.
Hai cancións como “Lela” ou a “Muiñeira de pandeiros”.
Castelao non só escribía.
Tamén era debuxante e pintor.
El mesmo dicía que esta obra non era só de Castelao escritor, senón sobre todo artista.
El mesmo fixo:
as máscaras dos personaxes,
a escenografía (decorados),
e a cartelaría (os carteis).
Agora pensade vós tamén neses elementos.
Fará falta facer decorados (escenografía)?
E vestiario?
Quen vai cantar?
Escribe no diario de aprendizaxe o que penses sobre isto.