QUERES NAMORAR?

Sabías que o amor e a lingua están moi relacionados? Pois cando lle queres facer as beiras a alguén tes que establecer diferentes tipos de diálogo para captar a atención da persoa que queres conquistar.

O proceso de conquista non é sinxelo, precísase ter varias dotes:

• Ser un pouco teatreiro ou teatreira.
• Ser bastante colaborativo/a.
• Ter ganas de leria.

Para ver as claves do proceso de namoramento propoñémosche o seguinte reto: serás quen de converterte nunha das personaxes namoradas de Os vellos non deben de namorarse? Serás quen de namorar do teatro?

Para pór en marcha a representación da obra de teatro de Os vellos non deben de namorarse ides ter que:

• Facer tantos grupos como lances.
• Adaptar a obra ás vosas posibilidades.
• Recadar a información necesaria sobre o autor, vestiario, espazo etc.
• Transformarte nunha actriz ou actor e chegar a saltar á escena.

Chanzos para construír o noso reto:

• 1ºchanzo: lectura guiada da obra de teatro.
• 2ºchanzo: análise do texto e da historia.
• 3ºchanzo: adaptación da obra ás nosas posibilidades.
• 4ºchanzo: reparto dos papeis dos personaxes.
• 5ºchanzo: ensaios.
• 6ºchanzo: representación da obra de teatro no salón de actos (ou espazo axeitado) do centro na última semana do REA.

Unha vez que teñas o reto, isto é, a obra de teatro realizada serás capaz de:

1. Participar activamente na planificación dunha peza teatral.
2. Interpretar as intencións dos personaxes e os propósitos comunicativos, tendo en conta o grao de formalidade da situación da peza teatral.
3. Procurar información sobre a obra que se traballa, o seu autor e a súa época.
4. Contrastar e procurar información coa finalidade de elaborar un xogo interactivo de preguntas e respostas.
5. Realizar unha lectura expresiva e posterior dramatización da obra, tendo en conta os mecanismos implicados na oralidade.
6. Coñecer as características do xénero dramático.
7. Identificar na obra teatral os principais elementos desta.
8. Coñecer e identificar algúns dos temas e tópicos máis frecuentes na literatura.

Para termos claro todo o que temos que ir facendo ao longo do proceso, e para ir marcando se xa está feito, se está en proceso ou se está por facer, tede á man sempre esta listaxe de cotexo (aquí en formato .pdf e aquí en formato .odt editable).